SQO-da týberkýlezdiń ashyq túrin juqtyrǵan bala eki apta mektepke barmaǵan

PETROPAVL. KAZINFORM – Soltústik Qazaqstan oblysy Novoıshımkadaǵy №1 orta mektepte týberkýlezdiń taralýyna jol bermeý úshin tıisti qaýipsizdik sharalary qolǵa alynǵan.

SQO bilim basqarmasynyń basshysy Aınagúl Suraǵanovanyń aıtýynsha, qazir bul mektepte 939 bala bilim alyp jatyr. 112 pedagog jáne 25 tehnıkalyq personal bar. Bala 29 sáýirden bastap aýyrýyna baılanysty mektepke barmaǵan. Qazir ol oblystyq emdeý mekemesinde em alyp jatyr.

- 13 mamyrda mektepke 6-synyptyń oqýshysyna ınfektsııalyq aýrý dıagnozy qoıylǵandyǵy týraly habar keldi. Sol kúni birden ata-analar jınalysy ótkizilip, habarlandyryldy. Aýdandyq sanıtarııalyq-epıdemıologııalyq qyzmet sanıtarlyq óńdeýden ótkizdi. Búgingi kúni munda barlyq qaýipsizdik sharalary júrgizilip jatyr. 6-synyp oqýshylaryn birden arnaıy mamandar kelip tekseristen ótkizdi. Búgingi kúni barlyq oqýshylar, muǵalimder tekserilip jatyr. Oblystyń ftızıatrlary keldi. Mektepte keste boıynsha dezınfektsııa júrgiziledi. Búgingi kúni sabaqtar bir kabınette oqytylyp jatyr. Balalardy qashyqtan oqytýǵa aýystyrý úshin negiz joq, - dedi Aınagúl Suraǵanova.

SQO sanıtarııalyq-epıdemıologııalyq baqylaý departamenti basshysynyń orynbasary Arman Kúshbasovtyń aıtýynsha, syrqattanǵan bala buǵan deıin 2021 jyly týberkýlezben aýyrǵan. 2022 jyly jazylyp, dárigerlerdiń baqylaýynda bolǵan.

- Aýrý oshaǵy úıde de dezınfektsııa júrgizildi. Qazir onymen baılanysta bolǵan barlyq adam tekserilip jatyr. Balalarǵa mantý egiledi. Jasóspirimder men eresekter flıýrografııa ádisimen tekseriledi. Qazirgi ýaqytta 17 adamǵa mantý egildi, úsh kúnnen keıin nátıjesi belgili bolady, - deıdi Arman Kúshbasov.

Buǵan deıin SQO-da 6-synyp oqýshysy týberkýlezdiń ashyq túrimen aýyrǵanyn jazǵan edik.