SQO-da «Taza Qazaqstan» aktsııasyna «jasyl eldikter» de qatysyp jatyr
PETROPAVL. KAZINFORM – Soltústik Qazaqstan oblysynda «Jasyl el» baǵdarlamasyna qatysýshylar bıyl bir aı ǵana jumys istemek. Nıet bildirgen jastarǵa eńbekaqy tólenedi jáne arnaıy kıim-keshekpen qamtylady. «Jasyl eldikter» «Taza Qazaqstan» aktsııasyna da belsendi qatysyp jatyr.
«Jasyl el» eńbek jasaǵy SQO-da 1 tamyzdan bastap iske kiristi. Uıymdastyrýshylarǵa bólingen kvota – 860 oryndy toltyrýda qıyndyq týmaǵan, jaz ýaqytynda eńbek etip, tabys tapqysy keletin jastardyń qatary az emes.
«Jasyl el» baǵdarlamasyna 14 pen 35 jas aralyǵyndaǵy jastar qabyldanady. Oǵan negizinen oqýshylar men stýdentter qatysyp jatyr. Eńbek jasaqtarynyń mindeti – qorshaǵan ortany qoqystan tazartý. Budan bólek kógaldandyrýmen, aǵash tuqymyn jınap, daıyndaýmen, ormandardy tazartýmen aınalysady. Sol úshin eńbekaqy tólenedi, arnaıy kıim – kostıým, fýtbolka, kepka, krossovkımen qamtylady. Jastar oblys boıynsha saıabaqtardy tazartýǵa kirisip ketti. «Jasyl el» jobasyna qatysýshylar Jastar resýrstyq ortalyǵy jáne orman sharýashylyqtary quramynda eńbek etedi. Dúısenbi-juma kúnderi aralyǵynda eńbek etedi. «Taza Qazaqstan» aktsııasyna da qatysady», - deıdi SQO boıynsha «Bolashaq» korporatıvtik qor basshysynyń orynbasary Janat Kákimov.
Petropavlda «Jasyl eldikter» qala turǵyndary, volonterler, memlekettik qyzmetshiler, kásipkerlermen qatar «Taza Qazaqstan» aktsııasyna qatysyp, qala kóshelerin, joldardyń jıegin, kópqabatty úılerdiń mańaıyn jáne qoǵamdyq oryndardy qoqystan tazartty. Jalpy bul joly is-sharaǵa 3 myńnan astam adam qatysty.
SQO ákimdiginiń málimetinshe, aktsııa bastalǵaly Petropavldan 340 myń tonna qoqys shyǵarylǵan.
Buǵan deıin Petropavlda 6 balasyn jalǵyz ózi tárbıelep jatqan Talǵat Týtýev jaıynda jazǵan edik.
