SQO-da Táýelsizdik kúnine oraı birqatar is-shara ótpek

Soltústik Qazaqstan oblysy Kishkenekól aýylynda Táýelsizdik kúni 16 páterlik turǵyn úı paıdalanýǵa berilmek, dep habarlaıdy Kazinform.

SQO Іshki saıasat basqarmasynyń málimetinshe, merekelik baǵdarlama ázir. Óńirde 10 jeltoqsannan bastap Táýelsizdik kúnine arnalǵan is-sharalar bastalyp ketti. Máselen Jastar resýrstyq ortalyǵy áleýmettik jelide beınequttyqtaýlardyń baıqaýyn uıymdastyrdy.

Mýzeılerde taqyryptyq kórmeler ótip jatyr. Kitaphanalar óz oqyrmandary arasynda dóńgelek ústelder, kezdesýler uıymdastyryp, táýelsizdik taqyrybynda áńgime órbitedi.

Sondaı-aq 11 jeltoqsannan bastap Petropavlda kıkbokstan Azamat Núrpeıisovty eske alýǵa arnalǵan respýblıkalyq týrnır jáne Joǵary lıganyń áıelder komandalary arasynda voleıboldan Qazaqstan Chempıonaty bastaldy.

13-14 jeltoqsan kúnderi jasóspirimder arasynda shańǵymen júgirýden oblystyq chempıonat ótpek.

15 jeltoqsanda shaıbaly hokkeıden SQO-nyń kýbogi ótedi. A.Vınokýrov sport saraıynda oıyndy tamashalaýǵa bolady.

Al 16 jeltoqsan kúni petropavlda Táýelsizdik Stelasyna gúl shoǵyn qoıý rásimi ótpek.

Dál osy kúni oblys ortalyǵynda «Haval» avtoortalyǵy ashylsa, Ýálıhanov aýdany Kishkenekólde 16 páterlik baspana paıdalanýǵa berilmek.