SQO-da tasqynnan zaqymdanǵan 700 úı jóndelip jatyr
PETROPAVL. KAZINFORM – Soltústik Qazaqstan oblysynda tasqynnan keıin zaqymdanǵan ınfraqurylymdy qalpyna keltirý, úılerdi jóndeý jáne turýǵa jaramsyz baspanalardy buzý jumystary júrgizilip jatyr.
SQO ákimi Ǵaýez Nurmuhambetov Qyzyljar aýdanyndaǵy Teplıchnoe, Petropavldaǵy Bylǵary jáne Zarechnyı kenti, Oıqala shaǵyn aýdanynda úılerdi jóndeý jáne apatty úılerdi súrý barysyn kórdi. Bul jaıynda óńir basshysy áleýmettik jelidegi paraqshasynda jazdy.
Qazirgi ýaqytta sý tasqynynan zardap shekken aýdandarda jumystardy oblystyń ár aýdanynan kómekke kelgen mehanıkalyq brıgadalar atqarý ústinde. Barlyǵy 600-den astam adam jumyldyrylǵan.
«Búgingi tańda qalpyna keltirýge kelmeıtin 220 úı buzyldy. Oblys boıynsha barlyǵy 1972 baspana jóndeýdi qajet etse, onyń 700-inde jóndeý júrip jatyr. Jaýapty basshylarǵa jáne bekitilgen aýdan ákimderiniń orynbasarlaryna úılerdi muqııat keptirip, jóndeýdi sapaly júrgizýdi tapsyrdym. Turǵyn úı máselesin sheshý qatań baqylaýda. Jańa «Birlik» shaǵyn aýdanynda 100 otbasy jańa baspanaǵa ıe boldy. 600 úıdiń qurylysy júrip jatyr, olar kestege saı berilmek. Oblysta ekinshi naryqta 450 páter satyp alyndy. Bul jumys áli de jalǵasady», - dedi Ǵaýez Nurmuhambetov.
Buǵan deıin Petropavlda tasqynnan zardap shekken taǵy 47 otbasy jańa baspanaǵa kirgenin jazǵan edik.
