SQO-da tamyz aıynda 73 zerthanasy bar ǵylymı keshen paıdalanýǵa beriledi

PETROPAVL. QazAqparat – Soltústik Qazaqstan oblysynda bilim berý salasyna bólingen qarjy byltyrǵymen salystyrǵanda 13%-ǵa artyp, 114 mlrd teńgege jetti, dep habarlaıdy QazAqparat tilshisi.

SQO qarjy basqarmasynyń málimetinshe, byltyr bilim berý sapasyn arttyrý maqsatynda 3,6 mlrd teńge mektep-kolledjderdi kúrdeli jóndeýge jumsaldy. Al materıaldyq-tehnıkalyq bazasyn nyǵaıtýǵa 3,7 mlrd teńge bólindi. Nátıjesinde mektep oqýshylaryn tasý úshin 16 kólik satyp alynǵan. Bilim berý nysandarynyń qazandyqtary jóndelip, jıhaz ben sportqa qajet qural-jabdyqtar jáne kitaptar alyndy.

«Bilim berý salasyndaǵy aýqymdy jobalardyń biri – M.Qozybaev atyndaǵy Soltústik Qazaqstan ýnıversıtetiniń jańa ǵylymı-zerthanalyq kesheni. Onyń qurylysy bıyl tamyz aıynda aıaqtalady dep josparlap otyrmyz. 18 700 sharshy metrdi alyp jatqan nysanda 73 zamanaýı zerthana jumys istemek. Bul jerde ınjenerııa jáne tsıfrlyq tehnologııalar, kólik jáne mashına jasaý, energetıka jáne radıotehnıka, azyq-túlik qaýipsizdigi, orman sharýashylyǵy agronomııasy men medıtsına mamandyqtary boıynsha stýdentter biliderin jetildiredi», - deıdi oblystyq qarjy basqarmasynyń basshysy Natalıa Dyshkant.

Byltyr óńirdegi úsh aýysymda oqý máselesin sheshý úshin Petropavlda 900 oryndyq mektep paıdalanýǵa berildi. Taıynsha qalasynda 600 oryndyq jáne Taıynsha aýdany Vıshnevka eldi mekeninde 120 oryndyq eki mekteptiń qurylysy bastaldy. Bilim ordalarynyń qurylysyna 324,9 mln teńge jumsaldy. Al Petropavlda stýdentterge arnalǵan 244 oryndyq jataqhana salynyp jatyr.

SQO bilim basqarmasynyń málimetinshe, bıyl bilim salasyna 114 mlrd teńge bólingen. Bul oblys bıýdjetiniń 35 %-y. Sonyń ishinde 2 mlrd teńgege 21 bilim berý nysany kúrdeli jóndeledi. Al 83 mektep jańǵyrtylmaqshy, ıaǵnı pándik kabınetter, jıhaz satyp alynady, ashanalar men kitaphanalar jóndeledi.