SQO-da suıytylǵan gaz talonmen satylyp jatyr

PETROPAVL. KAZINFORM – Soltústik Qazaqstan oblysynda suıytylǵan gaz jetispeýshiligi máselesiniń týyndaǵanyna bir aptadan asqan.

Kezinde arzan dep kóligine gaz qondyrǵysyn qoıdyrǵandar endi amalsyzdan benzınmen júrýge májbúr. Turǵyndardyń aıtýynsha, bul jylda qaıtalanatyn jaǵdaı. Petropavldaǵy keı gaz quıý stantsııalarynda kógildir otyn joq, barynda talonmen satylyp jatyr.

SQO energetıka jáne turǵyn úı-kommýnaldyq sharýashylyq basqarmasynyń málimetinshe, óńirde suıytylǵan gazdy satýmen 19 kompanııa aınalysady. Barlyǵy 122 gaz quıý stantsııasy bolsa, sonyń 41-i – Petropavlda, qalǵandary aýdandarda ornalasqan.

- Oblysqa orta eseppen aıyna 6 myń tonna gaz qajet. Al qazanda tek onyń shamamen 4 myń tonnasy ǵana jetkizildi. Qarasha aıynda 4896 tonna, jeltoqsanda 5220 tonna ákelinbek. Qazirgi ýaqytta oblysta gazdyń qory – 917 tonna. Jolda 300 tonna kele jatyr, - deıdi basqarma basshysynyń orynbasary Qýandyq Shaqýbaev.

Mamannyń aıtýynsha, 26 gaz quıý stantsııasynda ǵana suıyq otyn talonmen satylyp jatyr.

- Atyraý munaı óńdeý zaýyty josparly jóndeýge jabyldy. Bul ýaqytsha, jaǵdaı túzeledi. Jaqynda ákimdik QR Energetıka mınıstrligine hat joldap, qosymsha 2 myń tonna suıytylǵan gaz bólýdi surady. Alaıda, qosymsha gaz bólinbeı qaldy, - deıdi Qýandyq Shaqýbaev.

Bul jaǵdaı kópqabatty turǵyn úılerde gaz tutynatyn turǵyndarǵa áser etpeıtinin atap ótken jón.

Buǵan deıin Energetıka mınıstrligi Erlan Aqkenjenov Mańǵystaý óńirindegi gazǵa baılanysty ahýalǵa túsinikteme bergen edi.