SQO-da sý tasqynynyń ekinshi tolqyny bastaldy
PETROPAVL. KAZINFORM – Petropavlda birer kúnde sý tasqyny sharyqtaý shegine jetedi dep boljanǵan. Buǵan deıin myńǵa jýyq turǵyn úı sýǵa ketken Qyzyljar aýdanynda sý deńgeıi birtindep túse bastady.
Oblystyq shtabta ótken brıfıngte SQO TJD basqarmasynyń bastyǵy Sáken Aǵzamov áli 15 aýyldy sý basý qaýpi bar. Sondyqtan qazir negizgi kúsh osy eldi mekenderge jumyldyrylǵan. Olardyń barlyǵy Esil ózeniniń mańynda ornalasqan.
«Bolshaıa malyshka» aýylynda qazir evakýatsııa júrip jatyr. Bul eldi mekende 5 kúnnen beri bizdiń mamandar jumys isteýde. Qajet bolǵan jaǵdaıda Petropavldan taǵy da kómek barady. Barnevka, Kýstovoe, Vagýlıno, Olshanka sııaqty shaǵyn eldi mekender tasqyn sýdyń jolynda tur. Olardyń barlyǵyn baqylaýǵa aldyq. Keıbirinen turǵyndar tolyq qaýipsiz jerge kóshirildi. Sokolovkamen baılanys úzilýi múmkin. Qasynan respýblıkalyq mańyzy bar avtojol ótedi, ony sý basady dep boljap otyrmyz. Joldy saqtap qalý úshin bekitý jumysy júrgizilip jatyr», — deıdi Sáken Aǵzamov.
Sondaı-aq oblysta sý tasqynynyń ekinshi kezeńi bastaldy. Toqsan bı aýyly mańyndaǵy Esil ózeni deńgeıi ótken táýlikte 3 sm-ge kóterilgen. Sý Aqmola oblysyndaǵy Terisaqqan, Jabaı jáne Qalqutan ózenderinen kelip jatyr.
«Búgin Petropavl mańynda sý tasqynynyń sharyqtaý shegi tirkelmek. Oblys ortalyǵynda 17-18 sáýir kúnderine boljanǵan. Petropavl sý qoımasyndaǵy sý deńgeıi 1340 sm-ge deıin kóterildi, qaýipti deńgeı 940 sm. Dolmatovo aýyly mańynda Esil ózeni qarqyndy kóterilip jatyr. Qazir sý deńgeıi 1425 sm bolsa, qaýipti kórsetkish — 1450 sm. Al ekinshi tolqynǵa keler bolsaq, Toqsan bı aýyly mańynda Esil ózeninde — 15-20 sáýir aralyǵynda, Sergeev sý qoımasynda — 16-21 sáýir aralyǵynda, Pokrovka aýylynda — 18-23 sáýir, Novonıkolskoe eldi mekeninde — 20-25 sáýir aralyǵynda, al Petropavlda — 22-27 sáýir aralyǵynda sý tasqynynyń ekinshi kezeńi ótpek», — deıdi «Qazgıdromet» RMK SQO fılıalynyń dırektory Qymbat Merǵalımova.
Buǵan deıin SQO-da bir táýlikte 400-den astam turǵyn úıdiń sý astynda qalǵanyn aıtqan edik.
