SQO-da sý tasqynynan 100-ge jýyq kásipker zardap shekti
PETROPAVL. KAZINFORM – Soltústik Qazaqstan oblysynda bıznestiń 95 sýbektisi tasqynnan zardap shekti. Onyń 70-i Petropavlda, qalǵany Qyzyljar aýdanynda ornalasqan. Bul tizim áli de kóbeıýi múmkin.
SQO kásipkerler palatasy dırektorynyń orynbasary Jeńis Qazıevtiń aıtýynsha, qazirgi ýaqytta sý tasqynynan zardap shekkender sany áli de naqtylanyp jatyr.
«Qazirgi ýaqytta tasqynnan zardap shekkenderdiń basym bóligi – azyq-túlik, sharýashylyq dúkenderi. Sondaı-aq jıhaz jasaıtyn, bıtým, metall buıymdaryn satatyndar, aýyl sharýashylyǵy taýaryn óndirýshiler, qoǵamdyq tamaqtaný salasynyń ókilderi, tehnıkalyq qyzmet kórsetý ortalyqtary, oıyn-saýyq ortalyqtary bar. Ázirge bızneske naqty qansha shyǵyn kelgenin esepteý múmkin emes. Sý ketkennen keıin ǵana esebi júrgizilmek. Mamyr aıynyń basynda «2024 jylǵy sý tasqyny saldarynan shaǵyn jáne orta kásipkerlik sýbektilerine keltirilgen múliktik shyǵyndardy óteý erejeleri» resmı túrde qoldanyla bastaıdy, osyǵan oraı shyǵyn somasyn aıqyndaıtyn komıssııalardy qalyptastyrý boıynsha jumys bastaldy. Quramyna SQO kásipkerler palatasynyń dırektsııasy da kirdi. Tek kásipkerler múliktik shyǵyndardy tek sý ketkennen keıin ǵana baǵalata alady», - deıdi Jeńis Qazıev.
Orasan shyǵynǵa ushyraǵandardyń biri Qyzyljar aýdany Prıbrejnoe eldi mekeninde ornalasqan «Inkýbatorıı №1» JShS.
«Qus fabrıkasy jumyrtqany ınkýbatsııalaý jáne qus balapanyn satýmen aınalysady. 12 sáýirde JShS aýmaǵyn sý alyp, saldarynan bir kúndik 3 myń broıler shójesi jáne eki jetkizýshiden etti baǵyttaǵy qustyń 143 600 ınkýbatsııalyq jumyrtqasy jáne jumyrtqa beretin taýyqtyń 36 myń jumyrtqasy sýǵa ketti. Kásiporyn basshylyǵynan alynǵan aqparatqa sáıkes, tek osy boıynsha ǵana bıznes sýbektisi 38,6 mln teńgeden astam shyǵynǵa ushyrady. Al kásiporynnyń barlyq materıaldyq-tehnıkalyq bazasy da zardap shekkenin eskersek, jalpy shyǵyn 300 mln teńgeden asady», - deıdi Jeńis Qazıev.
Kásipkerlerdiń kópshiligi bir túnde taýar men jabdyqtardy ǵana emes, sonymen birge turaqty kiristi de joǵaltty, ıaǵnı olar qoldaǵy nesıelik mindettemelerin oryndaı almaıdy. Olardyń qyzmetkerleri de jumyssyz jáne turaqty tabyssyz qaldy. Jumysshylarǵa qandaı da bir áleýmettik kómek pen qoldaý tólenýi kerek pe? Ázirge kásipkerler osy jáne basqa da suraqtarǵa naqty jaýap taba almaı otyr.
«Qazirgi ýaqytta sý tasqynynan zardap shekken kásipkerlik sýbektileriniń tizimin Petropavl qalasy men oblys aýdandarynyń ákimdikteri jasap jatyr. Sondyqtan bul tizimge enbegen kásipkerler shuǵyl túrde qalalyq nemese aýdandyq ákimdikterge júginýi qajet», - ddeıdi Jeńis Qazıev.
Buǵan deıin elimizde mal shyǵyny ótelip jatqanyn aıtqan edik.
