SQO-da sý basýy múmkin eldi mekenderdi qorǵaýǵa 105 shaqyrymdyq 60 bóget salyndy

PETROPAVL. KAZINFORM – Soltústik Qazaqstan oblysynda kóktemgi sý tasqynynyń aldyn alý jáne saldaryn azaıtý maqsatynda 37 is-sharadan turatyn jospar júzege asyryldy. 

SQO ákimdigi apparatynyń azamattyq qorǵaý, terrorızmniń aldyn alý jáne eskertý bóliminiń bóliminiń basshysy Serik Ǵaısınniń aıtýynsha, onyń ishinde Esil ózeniniń negizgi salalary – Sharyq pen Jembaraq ózenderiniń 2 km astam arnasy tazartyldy. 131 mln teńgege Petropavlda Esil ózeniniń jaǵalaýy bekitildi. Al Sokoklovka eldi mekeniniń mańynda 125 mln teńgege Esil ózeniniń arnasy túzetildi.

– Zarechnyı kenti mańynda uzyndyǵy 4,3 km, eni – 5-21 metr bolatyn aınalma kanal salyndy. Osy maqsatqa 328 mln teńge jumsaldy. Qazirgi ýaqytta Petropavl sý qoımasynan tómen qaraı aǵyspen 32 km Esil ózeniniń túbin tereńdetý jáne tazartý boıynsha jobalyq-smetalyq qujat ázirlendi. Joba memlekettik saraptamada jatyr, - deıdi Serik Ǵaısın.

Jalpy SQO-da 112 eldi meken sý basý qaýpi bar aımaqta ornalasqan. Onyń elýine ózen-kólderdiń tasýynan sý kirýi múmkin. Aýyldardy sý basýdan qorǵaý úshin uzyndyǵy 105 km bolatyn 60 bóget salyndy.

– Qyzyljar aýdanyndaǵy Dolmatovo, Bolshaıa Malyshka jáne Olshanka aýyldarynda oblystyq rezerv esebinen jer úıindileri arnaıy ylǵalǵa tózimdi geomembranamen qaptalyp jatyr. Bul joba aıasynda 8,8 km úıindi bekitiledi. Budan bólek avtojoldarda sý ótkizý qubyrlary ornatyldy, aınalma kanaldar tereńdetildi, - deıdi Serik Ǵaısın.

Bıyl jylda sý basatyn Petropavldaǵy Zarechnyıı kentinen turǵyndardy kóshirý jalǵasady. Buǵan deıin 90 otbasy arnaıy salynǵan páterlerge kóshirildi. Mamyr aıynda 72 páterlik úı osy kent turǵyndaryna paıdalanýǵa beriledi. Qosymsha bıyl taǵy 72 páterdiń qurylysy bastalady.

SQO-da 6,9 mlrd teńge mólsherinde oblystyq tótenshe rezerv bekitilgen.

Buǵan deıin Petropavlda Esil ózeni tasyp jatqanyn jazǵan edik.