SQO-da sottalǵandar kásipkerlik negizin meńgerip, qarjylyq saýatyn arttyrady
PETROPAVL. KAZINFORM – Soltústik Qazaqstan oblysynda 200 sottalǵan jazasyn ótep shyqqannan keıin óz isin ashýǵa múmkindik almaq.
SQO Kásipkerler palatasynyń málimetinshe, sottalǵandardy qaıta áleýmettendirý jáne qoǵamǵa beıimdeý maqsatynda SQO boıynsha Qylmystyq-atqarý júıesi departamentimen yntymaqtastyq týraly memorandým jasaldy.
Eki taraptyń kelisimi boıynsha, endi óńirdegi №48 jáne №50 túzeý mekemelerindegi sottalǵandar úshin qysqamerzimdi kýrstar men sheberlik saǵattary uıymdastyrylady.
– Bul kelisim – áleýmettik mańyzy bar máselelerdi sheshýde kúsh biriktirýdiń mańyzdy qadamy. Biz sottalǵandardy kásibı oqytý arqyly olardyń bolashaqta qoǵamǵa sátti beıimdelýine jaǵdaı jasaımyz, - deıdi SKO Kásipkerler palatasynyń dırektory Esjan Orazalın.
Kásipkerler palatasy oqý protsesin uıymdastyrady.SQO QAJD – oqý úshin arnaıy bólmeler men jaǵdaı jasaıdy. Oqý aıaqtalǵan soń qatysýshylarǵa arnaıy sertıfıkattar beriledi.
Sottalǵandar kásipkerliktiń negizderi men qarjylyq saýattylyq boıynsha teorııalyq jáne praktıkalyq sabaqtardan ótedi.
Alǵashqy kezeńde eki mekemeden 120 adamdy qamtý josparlanǵan. Al jalpy alǵanda, shamamen 200 adam oqyp shyqpaq.
– Mundaı jobalar sottalǵandarǵa tek jańa daǵdylar úıretip qana qoımaı, olardy bolashaqta qoǵamǵa beıimdelýge kómektesedi. Bul jumys tabýyna jáne qylmysqa qaıta barmaýyna sep bolady. ıAǵnı, qylmys deńgeıin tómendetýge jáne áleýmettik turaqtylyqty arttyrýǵa baǵyttalǵan naqty qadam, - deıdi SQO QAJD bastyǵynyń orynbasary Qanat Esenov.
2024–2025 oqý jylynda óńir boıynsha 244 sottalǵan 11 túrli mamandyq boıynsha kásibı dıplom alǵan. Bıyl taǵy 250 adam kásip meńgerip jatyr.
Al memorandým qol qoıylǵan sátten bastap kúshine endi jáne uzaq merzimdi, turaqty áriptestikke jol ashady.
Buǵan deıin Petropavlda sorǵy stantsııasyn jóndeýge arnalǵan qarajatty jymqyrǵan basshy jazalanǵanyn jazǵan edik.