SQO-da sońǵy eki aıda koronavırýstan 40 adam qaıtys boldy

PETROPAVL. QazAqparat – Soltústik Qazaqstan oblysynda ambýlatorlyq em alyp jatqan syrqattardyń sany 2,5 esege azaıdy. Aqpan aıynyń basynda naýqastardyń sany 4 myńǵa jetip qalsa, qazir 1,5 myń adam emdelip jatyr, dep habarlaıdy QazAqparat tilshisi.

SQO densaýlyq saqtaý basqarmasynyń basshysy Nurlan Aımanovtyń aıtýynsha, syrqattanǵandar sany sońǵy eki aptadan beri azaıyp keledi. 8 aqpan kúni ınfektsııalyq statsıonarlarda 450 naýqas bolsa, búgin 257 adam em alyp jatyr. Aýrýhanalar 17 %-ǵa júktelgen. Bir táýlikte 19-30 adam qabyldanady.

«Densaýlyq saqtaý basqarmasy ambýlatorlyq-emhanalyq kómek kórsetetin mekemelerdiń jumysyna kúndelikti monıtorıng júrgizedi. Qazirgi ýaqytta 1514 adam ambýlatorlyq em alyp jatyr, bul aqpan aıynyń basyndaǵy kórsetkishten 2,5 ese az. «KVI boıynsha shtab» jumysy jalǵasqan, ol jumysty úılestirip, qadaǵalaıdy, basqarmaǵa sheshim qabyldaý úshin koronavırýs boıynsha jedel aqparat ázirleıdi», - deıdi Nurlan Aımanov.

Ótken táýlikte SQO-da KVI juqtyrýdyń 62 jańa jaǵdaıy tirkeldi. 21 adam jansaqtaý bólimshesinde jatyr. Bir adam kóz jumyp, qaıtys bolǵandar sany 479 adamǵa jetti. Mamandardyń aıtýynsha, bıyl qańtar-aqpan aıynda 40 adam koronavırýs juqtyryp, ómirden ótken, al jeltoqsan aıynda 65 adam dúnıe salǵan edi.