SQO-da sońǵy jarty jylda jelsheshek juqtyrý deregi úsh ese azaıdy
PETROPAVL. KAZINFORM – Soltústik Qazaqstan oblysynda jelsheshekpen aýyrý báseńdedi. Ótken jarty jylda óńirde 725 adam aýyrsa, byltyr sáıkes kezeńde 2244 syrqat tirkelgen.
SQO sanıtarııalyq-epıdemıologııalyq baqylaý departamenti basshysynyń orynbasary Arman Kúshbasovtyń aıtýynsha, jelsheshek – jiti ınfektsııalyq aýrý. Kóbine balalar syrqattanyp, keıin ımmýnıtet qalyptasady, ınfektsııanyń qaıtalanýy óte sırek kezdesedi.
Al eresekter jelsheshekti juqtyrǵan jaǵdaıda ol áldeqaıda aýyr ótedi, dene qyzýy qatty kóterilip, bas aýyrady, júıke júıesi buzylýy múmkin. Asqynǵan jaǵdaıda ishki organdar men mıdyń zaqymdanýyna – pnevmonııa, entsefalıt, gepatıtke ákelýi múmkin, keıde sońy ólimmen de aıaqtalatyn jaǵdaılar bolady.
«Aýrý bastalǵanda syrqattyń dene qyzýy 37,5 ℃-tan 39℃ deıin kúrt kóteriledi, basy aýyrady. Jelsheshekke tán belgileri – denege bórtpe shyǵyp, onyń qyshýy.
Jelsheshektiń qyzylsha, qyzamyq, skarlatına bórtpelerinen aıyrmashylyǵy, ol tek teride jáne shyryshty qabattarda ǵana emes, bas terisinde de paıda bolady. Dene temperatýrasy ádette 3-5 kúnde qalypqa keledi, al bórtpedegi qotyr 7-14 kúnnen keıin túse bastaıdy. Naýqas bórtpe shyqqannan keıin 10 kún ótisimen saýyǵa bastaıdy», - deıdi Arman Kúshbasov.
Infektsııa aýrý adamnan aýa tamshylary arqyly jótelgende, túshkirgende, sóıleskende taralady. Sondyqtan naýqas pen saý adamdar arasyndaǵy baılanysty shekteý óte mańyzdy.
«Jelsheshekpen aýyrǵan naýqas terige bórtpe shyǵardan 20-24 saǵat buryn jáne sońǵy vezıkýla-bórtpe paıda bolǵannan keıin 5 kún boıy aýrý juqtyrýy múmkin. Inkýbatsııalyq kezeń 21 kúnge deıin sozylady.
Eger otbasynda bireý aýyryp qalsa, mindetti túrde dárigerdi shaqyrý kerek. Asqynýǵa jol bermeı, em alǵan jón. Al aldyn alý úshin naýqaspen baılanysty shektep, oǵan jeke ydys-aıaq, tósek-oryn, gıgıenalyq kerek-jaraq bólý kerek. Kıimderi men tósek-oryndaryn bólek jýyp, úı-jaıdy jıi jýyp jáne jeldetip otyrý qajet», - deıdi Arman Kúshbasov.
Buǵan deıin Almatyda sırek kezdesetin júrek aýrýyna shaldyqqan 21 jastaǵy jigitke kúrdeli ota jasalǵanyn jazǵan edik.
