SQO-da «Soltústiktiń injýi-2023» atty týrıstik slet ótpek

PETROPAVL. QazAqparat – Soltústik Qazaqstan oblysynda «Soltústiktiń injýi-2023» atty týrıstik slet ótpek. Іs-shara óńirdiń týrıstik aımaǵy – Aıyrtaý aýmaǵynda uıymdastyrylyp, oǵan kolledj stýdentteri qatysady, dep habarlaıdy QazAqparat tilshisi.

SQO kásipkerler palatasy baspasóz qyzmetiniń málimetinshe, «Soltústiktiń injýi-2023» týrıstik sleti – oblystyq kásipkerler palatasynyń bastamasy.

Imantaý-Shalqar tabıǵı aımaǵyn damytýdy maqsat etken is-shara mamyr aıynyń ortasyna josparlanǵan. Slet Aıyrtaý aýdanynyń Lobanovo eldi mekeninde ótpek.

Uıymdastyrýshylardyń aıtýynsha, ol jylda ótkiziletin dástúrli is-sharaǵa aınalýy tıis. Maqsaty – jastar arasynda buqaralyq týrızmdi nasıhattap, damytý. Týrısterge qajet negizgi daǵdylardy qalyptastyryp, salamatty ómir saltyn ustanýǵa shaqyrý, tabıǵatty jáne qorshaǵan ortany aıalaýǵa tárbıeleý.

«Uıymdastyrýshylar – kásipkerler palatasynyń týrızm komıteti, oblystyq bilim basqarmasy, «Zeınep» kópbeıindi joǵary kolledji, «Alpınızm, jartasqa órmeleý, muzǵa órmeleý jáne sporttyq týrızm federatsııasy» SQO qoǵamdyq birlestigi, sondaı-aq qalalyq balalar men jasóspirimderdiń mektepten tys jumys ortalyǵynyń týrızm bólimi. Sletke 15 pen 20 jas aralyǵyndaǵy ul-qyzdar qatysady, ıaǵnı bul bizdiń oblys kolledjderiniń stýdentteri de, syrttan kelgen komandalar da bolýy múmkin», – deıdi SQO kásipkerler palatasynyń dırektory Tımýr Bekeev.

Іs-sharaǵa qatysýshylar qyzyqty jáne tanymdyq konkýrstarǵa, sondaı-aq tájirıbesi bar saıahatshylardyń sheberlik saǵattaryna qatysady.

«Jas týrısterge qajetti týrıstik daǵdylar: fotoǵa túsirýdi, joryqta as daıyndaýdy meńgeredi, jabdyqtarmen tanysady, túrli sheberlik saǵattarynan ótedi. «Qazaq Expedition Club» avtosaıahatshylarynyń ómiri týraly aıtyp beremiz. Bolashaqta olardyń bireýi álemdi tanyp, Qazaqstandy sheteldik týrıster arasynda tanymal eter», - deıdi SQO kásipkerler palatasy týrızm komıtetiniń tóraǵasy Saıran Hamza.

Sondaı-aq, slet barysynda jastar jumsaq zembildi toqýdy úırenedi jáne «zardap shegýshini» aspaly ótkel arqyly tasymaldaýdy meńgeredi.

Іs-sharaǵa qatysýshylar keshti alaý basynda ánderdi oryndaýmen ótkize alady, árıne, bı keshi de uıymdastyrylmaq.

Konkýrsqa qatysýǵa ótinim berýge, sondaı-aq týrıstik slet týraly tolyq aqparatty myna elektrondyq mekenjaı boıynsha bilýge bolady: [e-mail] nemese whatsapp arqyly: [phone].

Ótinimder joǵaryda kórsetilgen mekenjaı boıynsha 20 sáýirine deıingi merzimde qabyldanady.