SQO-da shoshqa tumaýyn juqtyrǵandar tirkeldi

PETROPAVL. KAZINFORM – Soltústik Qazaqstan oblysynda jiti respıratorlyq vırýstyq ınfektsııany ótken aptada 4,5 myńǵa jýyq adam juqtyrdy. Osylaısha syrqattanǵandar sany bir aptada 10%-ǵa ósken.

SQO sanıtarlyq-epıdemıologııalyq baqylaý departamenti baspasóz qyzmetiniń málimetinshe, jańa epıdemııalyq maýsym bastalǵaly 29,5 myń adam JRVI juqtyrǵan. Bul ótken jyldyń uqsas kezeńimen salystyrǵanda 5%-ǵa tómen. Syrqattanǵandardyń 67%-y – 14 jasqa deıingi balalar. Ótken aptada JRVI-di 4 419 adam juqtyrdy. Aldyndaǵy aptamen salystyrǵanda 10% ósim bar. 

– 4 jeltoqsanda A (H1N1-pdm-09) tumaýyn juqtyrýdyń eki jaǵdaıy tirkeldi. Syrqattyń biri – mektep oqýshysy, qazir Kópbeıindi oblystyq balalar aýrýhanasynda em alyp jatyr. Ekinshisi áskerı qyzmetshi, ol Petropavldaǵy birinshi qalalyq aýrýhanada jatyr. Ekeýi de tumaýǵa qarsy ekpe almaǵan. 

Ótken epıdemııalyq maýsymmen salystyrǵanda tumaý bıyl bir aıǵa kesh bastalyp otyr. Sondaı-aq oblysta basqa vırýstyq respıratorlyq ınfektsııalardyń taralýy júrip jatyr. Olar: rınovırýstar – 28 jaǵdaı, adenovırýstar - 27 jaǵdaı, paragrıpp - 20, bokavırýstar – 5, metapnevmovırýstar - 4 jáne basqa koronavırýstar – 2 jaǵdaı, - deıdi vedomstvonyń bas mamany Aınash Saǵandyqova.

A (H1N1-pdm-09) tumaýyn, sondaı-aq «shoshqa tumaýy» dep te ataıdy.

- Shoshqa tumaýy – juqpaly aýrý. Ony adamdar ǵana emes, úı shoshqalary, qustar jáne basqa da janýarlar juqtyrady. A (H1N1) vırýsy elimizde, onyń ishinde SQO-da 2009 jyldan beri taralyp keledi.

«Shoshqa tumaýy» negizinen adamnan adamǵa aýa arqyly juǵady. Onyń erekshe belgiler joq. Tumaýǵa ortaq birdeı belgileri bar: bas jáne bulshyqet aýrýy, joǵarǵy tynys joldarynyń zaqymdanýy (qurǵaq jótel, murynnan sý aǵý, tamaqtyń jybyrlaýy, aýa jetispeýshiligi), temperatýranyń 38-39° deıin kóterilýi, qatty álsizdik, aýrýdyń kenetten bastalyp, jaǵdaıdyń tez nasharlaýy. Al tumaýdyń aldyn alýdyń birden-bir joly – ekpe alý, - deıdi Aınash Saǵandyqova.

Buǵan deıin SQO-da jalpy somasy bir mlrd teńge bolatyn 3 myńnan astam ota kózge tegin jasalǵanyn jazǵan edik.