SQO-da sheteldikterdiń qatysýymen júrekke tiliksiz ota jasaldy

PETROPAVL. QazAqparat – Soltústik Qazaqstan oblystyq kardıologııalyq ortalyqta Shveıtsarııa, Germanııadan kelgen professorlardyń qatysýymen jergilikti kardıohırýrgtar júrek aqaýy bar úsh syrqatqa tiliksiz ota jasady. Bul sheberlik saǵatynyń maqsaty – emdeý mekemesiniń kúndelikti tájirıbesine transkateterli qolqa qaqpaqshasyn ımplantatsııalaý boıynsha otanyń jańa ádisin engizý, dep habarlaıdy QazAqparat tilshisi.

Syrqatqa otany kardıologııalyq ortalyqtyń dárigerleri jasady. Al Shveıtsarııa, Germanııadan arnaıy kelgen professorlar operatsııanyń barysyn baqylaýda ustady. Bul - olardyń bizdiń óńirge ekinshi sapary. Petropavlǵa kelmes buryn sheteldikter Astanada, Oralda bolyp, qolqa qaqpaqshasyn transkateterlik ımplantatsııalaý otasyna qatysty.

«Aqpan aıynda biz úsh sátti ota jasap, qolqa qaqpaqshasyn transkateterlik ımplantatsııaladyq. Búgin basqa úsh syrqatqa osyndaı ota jasaımyz. Bul naýqastar osyndaı TAVI - qolqa qaqpaqshasyn transkateterlik ımplantatsııalaý operatsııasyn jasaýǵa bolatyn statıstıkalyq orta jasqa jatady, ıaǵnı 70-75 jasta.

Nelikten otanyń bul túrine basymdyq berilgen, óıtkeni ol jabyq túrde, keýde qýysyn ashpastan, narkoz berilmeı jasalady. Nátıjesinde syrqat ashyq otaǵa qaraǵanda óte tez qalpyna kelip, aıaǵyna turady. Jergilikti dárigerler jaqsy tájirıbe jınaqtap, osyndaı otany ózdiginen jasaý úshin bizdiń qatysýymyzben jylyna 10-15 operatsııa jasalýy tıis.

Qajetti daǵdy qalyptasqannan keıin ǵana olar sheteldik mamandardyń qashyqtan baqylaýymen, keńes berýimen ota jasaıtyn bolady», - deıdi professor Keıs Oldroıd.

Buryn qolqa stenozy bar egde jastaǵy syrqattarǵa otany Astana jáne Almaty ortalyqtarynda jasalatyn. Endi jergilikti kardıologtar jańa tehnologııany meńgerip jatyr, al protez retinde qara maldyń júrek qabyn paıdalanady.

«Bul - biregeı ota. Jasy 70-ten asqan syrqattarǵa jasynyń ulǵaıýyna, sozylmaly aýrýlarǵa baılanysty ashyq ota jasaýǵa bolmaıdy. Sheteldik mamandar kelmes buryn biz syrqattardy iriktep aldyq, bir aı boıy olardy daıyndadyq. Túrli tekserýler júrgizip, shaq keletin qaqpaqsha tańdap, shetelden tapsyryspen alǵyzdyq.

Ota az jaraqatty bolǵandyqtan, ekinshi kúni syrqattar ózdiginen júre alady, tipti úılerine de jiberilýi múmkin. Ereksheligi de sol, olar úırenshikti isterimen aınalysa alady.

Qazirgi ómir súrý saltyna baılanysty, kóp otyryp, az qımyldaýdyń saldarynan 50 jastan keıin stenozǵa alyp keletin júrek aýrýlary paıda bolady. Sondyqtan da otanyń bul túrine suranys bar», - deıdi oblystyq kópsalaly aýrýhanasynyń bas dırektory Sáken Ámrın.

Mamannyń aıtýynsha, elimizde kardıologııalyq qyzmet jaqsy damyp keledi. Qazaqstan boıynsha osyndaı 500 shaqty qolqa qaqpaqshasy qoıylǵan. Bul – joǵary tehnologııalyq operatsııa, bir-bireýi 5-6 mln teńge turady. Syrqattarǵa ol mindetti áleýmettik medıtsınalyq saqtandyrý aıasynda tegin jasalady.

«Bizdiń kardıologııalyq ortalyqta joǵary tehnologııalyq otalar birneshe jyldan beri jasalyp keledi. Kezinde koronografııa, stentteý, aorta-koronarlyq shýnttaý – júrek, qolqaǵa shýnt qoıýdy úırendik. Qazir júrekke kardıostımýlıator qoıamyz, júrekke radıojıilik ablıatsııa jasaımyz. Bıyl Shveıtsarııa, Germanııa professorlarymen sóılesip, kelisimshartqa otyryp, qolqa stenozy kezinde qolqa qaqpaqshasyn transkateterlik ımplantatsııalaý ádisin úırenip jatyrmyz. Bul elimizdiń birneshe qalasynda jasalady. Biz de olardan qalyp jatqan joqpyz, óz jumysymyzǵa engizemiz», - deıdi SQO kópsalaly aýrýhanasy kardıologııalyq ortalyq dırektory Azamat Maǵzumov.