SQO-da Senat depýtattary aýyl sharýashylyǵy salasyndaǵy ózekti máselelerdi talqylady

ASTANA. QazAqparat - Parlament Senatynyń «Óńir» depýtattyq toby Qazaqstan Respýblıkasy Prezıdentiniń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» Joldaýy aıasynda Soltústik Qazaqstan oblysynyń kásiporyndarynda aýyl sharýashylyǵy ónimderin qaıta óńdeýdiń ózekti máseleleri men keleshegin talqylaý maqsatynda osy óńirde otyrys ótkizdi. Bul týraly QR Parlamenti Senatynyń baspasóz qyzmeti habarlady. 

«Óńir» depýtattyq tobynyń jetekshisi Mıhaıl Bortnık kezdesýdi asha kelip, Memleket basshysy eńbek ónimdiligin arttyrý jáne qaıta óńdelgen aýyl sharýashylyǵy ónimderiniń eksportyn túbegeıli ulǵaıtý mindetin alǵa qoıǵanyn eske saldy. Biz álemdik naryqqa joǵary sapaly daıyn ónimmen shyǵýymyz kerek. Joldaýda «Sonymen qatar jerdi barynsha tıimdi ıgeretinderdi yntalandyryp, al durys paıdalana almaıtyndarǵa shara qoldaný kerek. Tıimsiz sýbsıdııalardy aýyl sharýashylyǵy kesheni sýbektilerine arnalǵan bank nesıelerin arzandatýǵa qaıta baǵyttaý qajet», - dep atap ótilgen bolatyn. Prezıdent agroónerkásip keshenindegi eńbek ónimdiligin 5 jyl ishinde arttyrýdy jáne óńdelgen aýyl sharýashylyǵy ónimderin eksporttaýdy kem degende 2,5 ese ulǵaıtýdy tapsyrdy. Osy mindetterdi iske asyrý úshin aýqymdy jumystardy atqarýǵa týra keledi.


Senatynyń depýtattarynyń Soltústik Qazaqstan oblysyndaǵy aýyl sharýashylyǵy kásiporyndaryn aralaý barysynda kóz jetken keıbir oń nátıjelerge qaramastan, M.Bortnık birqatar ózekti máselelerdi atap ótti. Onyń ishinde shıkizatty daıyndaý men saqtaý júıesiniń kenje qalýy, qarjylandyrýǵa qol jetkizý múmkindiginiń shekteýli bolýy, aýyl sharýashylyǵy ǵylymynyń óndiristen alshaqtyǵy, taýar ótkizý naryqtarynyń taryla bastaýy jáne taǵy basqa máseleler aıtyldy.

M.Bortnıktiń sózinshe, ortalyq jáne jergilikti atqarýshy memlekettik organdardyń, qarjy ınstıtýttarynyń, aýyl sharýashylyǵy joǵary oqý oryndary men ǵylymı-zertteý ortalyqtarynyń, sondaı-aq taýar óndirýshilerdiń resýrstaryn tarta otyryp, bul máselelerdi keshendi túrde sheshý kerek.


Aýyl sharýashylyǵy mınıstriniń birinshi orynbasary Arman Evnıev salany damytý strategııasyna klasterlik sıpatty engizý qajettigin atap ótti. Klasterlik ádis qana osy salanyń básekege qabilettiligin arttyrýdyń tıimdi quraly bolyp tabylady.

Otyrysta Soltústik Qazaqstan oblysy ákiminiń birinshi orynbasary Aıdarbek Saparov, Qazaq aýylsharýashylyǵy ónimderin qaıta óńdeý ǵylymı-zertteý ınstıtýty bas dırektorynyń mindetin atqarýshy Gaını Sarbasova jáne basqalar qatysty.

Sóz sóıleýshiler astyqty jan-jaqty óńdeý men ónimderden qosymsha qun alýdyń mańyzdylyǵyn atap ótti.

Bıdaı, mal sharýashylyǵy, maıly daqyldar men sút salasy boıynsha aıtarlyqtaı eksporttyq áleýeti bar, astyq daqyldaryn óndirýde álemde ekinshi oryn alatyn Qazaqstanǵa dúnıejúziniń azyq-túlik naryqtaryna shyǵýdyń tamasha múmkindikteri bar.



Senator Erik Sultanov aýyl sharýashylyǵy ónimderin budan da tereń óńdeýge kóshirý qajettigi men joǵary qosymsha qunmen eksportqa shyǵý týraly aıtty.

Talqylaýǵa senatorlar Erik Sultanov, Rashıt Ákimov, Bekmyrza Elamanov, Muratbaı Joldasbaev jáne Sergeı Plotnıkov, sondaı-aq birqatar memlekettik organdardyń, sharýa qojalyqtary men aýyl sharýashylyǵy kooperatıvteriniń basshylary qatysty.

Senatorlar kóshpeli otyrys barysynda «Taıynsha maı» seriktestiginde, «BioOperations» (dán ulpasy men krahmal zaýyty), «Petropavl traktor zaýyty», «Maslodel», «RımKazAgro» mekemeleri men et komınatynda bolyp, óndiriske ınnovatsııalyq tehnologııalardy engizý jumystarymen tanysty.