SQO-da Prıbrejnoe eldi mekenine kiretin jol jabyldy
PETROPAVL. KAZINFORM — Soltústik Qazaqstan oblysy Prıbrejnoe eldi mekenimen jol qatynasy úzildi.
Qyzyljar aýdany Prıbrejnoe eldi mekeninde 1,5 myń adam turady. Esil ózeni tasyǵandyqtan, jan-jaqtan sý qaýmalap, aýyl aralda qalǵan. Oǵan aparar joldy sý basqandyqtan, qazir turǵyndar qutqarýshylardyń «vahtovık» kóligimen ǵana qatynap jatyr. Ázirge úılerdi sý basý qaýpi joq.
Oblystyq tótenshe jaǵdaılar departamenti baspasóz qyzmetiniń málimetinshe, óńirde búginde eki avtomobıl jolyn — bireýi respýblıkalyq, ekinshisi oblystyq mańyzdaǵy trassany sý basty. Bul joldarmen ótýge kóliktiń barlyq túrine shekteý qoıylǵan. Olar — «Chelıabi — Novosibir» halyqaralyq tasjolynda jatqan Petropavl qalasyn aınalyp ótý joly. Qutqarýshylardyń aıtýynsha, Esil ózeniniń tasýynan joldaǵy jaıylǵan sýdyń uzyndyǵy 235 m, tereńdigi 160 sm-ge jetti. Ýchaske sıgnaldyq baǵandarmen belgilengen, eskertý jol belgileri ornatylǵan, mamandar táýlik boıy kezekshilik atqaryp jatyr.
Ekinshisi — Prıbrejnoe eldi mekenine aparar jol. «Petropavl — Voronıı ostrov» oblystyq mańyzy bar joldyń sý basqan ýchaskesiniń uzyndyǵy 600 metr, tereńdigi 55-60 sm-ge deıin. Munda da qutqarýshylar men tártip saqshylary táýlik boıy kezekshilik atqaryp jatyr. Eldi mekendi sý basý qaýpi joq.
— Úılerdi sý basý, sýdyń joldardy buzý faktileri tirkelgen joq. Jalpy sý tasqyny bastalǵaly avtomobıl joly arqyly sý ótýiniń 28 deregi tirkeldi.
Bıyl eldi mekenderden 1,4 mln tekshe metr qar shyǵaryldy. Arnaıy tehnıkamen 974 myń tekshe metr sý soryldy. 200 myńnan astam qum salynǵan qap ázirlendi, 385 tonna ınertti materıal sý jolyna tóseldi, — deıdi oblystyq TJD baspasóz hatshysy Evgenıı Jýravlev.
Buǵan deıin Petropavl mańyndaǵy saıajaı ýchaskelerin sý basqanyn jazǵan edik.