SQO-da ósimdik maıy men jarmalar arzandady

PETROPAVL. KAZINFORM – Soltústik Qazaqstan oblysynda ınflıatsııa jyldyq esepteýmen alǵanda 8,9% jetti. Bir jyl ishinde azyq-túlik taýarlary 6,4%, aqyly qyzmetter 15,3% qymbattaǵan.

SQO Ulttyq statıstıka bıýrosynyń málimetinshe, esepke ótken jyldyń maýsymynan bıylǵy maýsymǵa deıinge aralyq alynǵan. Bir jyl ishinde jemister baǵasy 22,4%, kondıter ónimderi – 13,4%, tuzdalmaǵan sary maı – 12%, balyq jáne teńiz ónimderi – 10%, sıyr jáne shoshqa eti 5% ósken. 

Jarmalar 22% arzandasa, kúrish 29% qymbattady. Alkogoldi ishimdikter baǵasy da artyp, 16% ósti. Kókónisterdi byltyrǵymen salystyrǵanda 3% arzanǵa alýǵa bolady, sonyń ishinde pııaz baǵasy 43%, qyryqqabat 14% tómendedi, al qyzylsha – 17%, kartop – 12%, sábizge – 4,5% qymbattady. Ósimdik maıy 19% arzandady.

Baǵa jeke bas tutynýyna arnalǵan buıymdar, prıborlar jáne taýarlarǵa – 14%, farmatsevtıkalyq ónimderge – 10%, kıim jáne aıaq kıimge – 8%, turǵyn úı-jaıǵa qyzmet kórsetý jáne jóndeýge arnalǵan materıaldarǵa – 6% ósken. Jýý jáne tazalaý quraldaryna baǵa 4,5% tómendedi.

Turǵyn úı-jaıdy jalǵa alýǵa jumsalatyn naqty tólemder – 22,5%, ambýlatorlyq qyzmetterge – 13%, qoǵamdyq tamaqtandyrý qyzmetine – 11% ósti. Kólik qyzmetteriniń baǵalary – 13,5%, sonyń ishinde temir jol kóliginiń bıleti 10% qymbattady. Shashtaraz jáne jeke qyzmet kórsetý mekemeleri de qyzmet baǵasyn qymbattatyp, 18% ósirdi. 

Buǵan deıin SQO Beskól aýylynda eki jasóspirimniń denesi sýdan tabylǵanyn jazǵan edik.