SQO-da múgedektigi bar balalarǵa arnalǵan ońaltý ortalyǵy ashylady

PETROPAVL. KAZINFORM – Soltústik Qazaqstan oblysynda qazirgi ýaqytta 24 myńnan astam múgedektigi bar adam turyp jatyr.

SQO jumyspen qamtýdy úılestirý jáne áleýmettik baǵdarlamalar basqarmasynyń basshysy Rınat Eljasovtyń aıtýynsha, onyń 2,4 myńy – balalar. Sońǵy jyldary aýtızm dıagnozy qoıylǵan balalar sany artqan. 

- Múgedektigi bar balalardy ońaltý máselesi bar. Sondyqtan bıyl osyndaı múmkindigi shektelgen balalardy ońaltatyn ortalyqty paıdalanýǵa berýdi josparlap otyrmyz. Áleýmettik nysan 150 balaǵa shaqtalady, - deıdi Rınat Eljasov. 

Jalpy byltyr oblysta ońaltý quraldaryn alýǵa jáne áleýmettik qyzmet kórsetýge 2,4 mlrd teńge bólingen. Bıyl bul maqsatqa 3,2 mlrd teńge jumsaý josparlanǵan. 

- Múgedektigi bar adamdarǵa áleýmettik mańyzy bar nysandardyń qoljetimdiligin anyqtaý maqsatynda «Qoljetimdiliktiń ınteraktıvti kartasy» jasaldy. Monıtorıngtik toptar ǵımarattardyń talapqa saı bolýyn tekserip, nysan ıelerimen túsindirý jumysyn júrgizedi.

Áleýmettik Kodeks aıasynda múgedektigi bar jáne zeınet jasyndaǵy adamdarǵa arnaıy áleýmettik qyzmet kórsetý sapasyn arttyrý boıynsha jumys júrgizilip jatyr. Mundaı qyzmet oblysta 5 myńnan astam adamǵa kórsetiledi, - deıdi Rınat Eljasov.

Basqarma basshysynyń aıtýynsha, byltyr memlekettik áleýmettik tapsyrys aıasynda arnaıy áleýmettik qyzmet 400-den astam adamǵa kórsetilgen. Olardyń 72-si - turmystyq zorlyq-zombylyqtan, ekeýi – adam saýdasynan zardap shekken. 

Buǵan deıin SQO-da eldi mekenderdiń 59 paıyzynda ǵana mádenıet nysandary jumys istep turǵanyn jazǵan edik.