SQO-da muǵalimderdiń jetispeýine qatysty másele tolyq sheshildi

PETROPAVL. QazAqparat – Soltústik Qazaqstan oblysynda úsh jyl buryn 800-ge jýyq muǵalimniń orny bos tursa, búginde kadr jetispeýshiligi máselesi tolyq sheshilgen, dep habarlaıdy QazAqparat tilshisi.

Búgin oblys ákimdiginiń otyrysy ótip, óńir basshysy Qumar Aqsaqalovtyń jetekshiligimen oqý jylynyń aıaqtalýy jáne Biryńǵaı ulttyq testileýge daıyndyq barysy pysyqtaldy.

Qashyqtan oqýǵa kóshý muǵalimderge, oqýshylarǵa ǵana emes, ata-analarǵa da aıtarlyqtaı syn boldy. Kópshiligi onlaın oqýǵa daıyn bolmaı shyqty. Turmysy tómen otbasylardyń balalaryn qajetti tehnıkamen qamtý úshin 580 kompıýter alynyp, taratyldy.

Óńirde muǵalimderdiń tapshylyǵy máselesi de tolyq sheshildi. 3 jyl buryn oblysta 737 muǵalim jetispese, qazir bos oryn múldem qalmaǵan.

Mektepterdiń jaǵdaıy da birtindep jaqsaryp keledi. Byltyr 142 bilim berý mekemesi jóndeldi. Synyptarda jaıly temperatýra bolýy úshin ǵımarattardyń jylytý júıesine basymdyq berildi. Nátıjesinde aýyryp sabaq qaldyrý 41% tómendedi. Bıyl mektepterdi jańǵyrtý jumysy jalǵasady. Osy maqsatqa 5 mlrd teńge bólingen.

2017 jyly 1390 túlek qazaqstandyq joǵary oqý oryndaryna tússe, byltyr olardyń sany 2 myńǵa jýyqtady. Jergilikti ýnıversıtetke oqýǵa túsetinderdiń sany 30% artty.

Jıynda óńir basshysy UBT daıyndyq barysyn da pysyqtady. Qumar Aqsaqalov testileý kezinde túlekterge qysym kórsetpeýdi, ár jaýapty qyzmetke mindetin durys atqarýdy tapsyrdy.

«UBT kezinde balalardyń jaǵdaıyna mán berý kerek. Kúızelis týdyratyn jaǵdaı, kireberistegi tekseris túlekterge keri áser etip, test nátıjesine yqpal etýi múmkin. Sol sebepti emtıhan barysynda qaýipsizdik jáne basqa da tıisti sharalardy baıqap júrgizý qajet», - dedi Qumar Aqsaqalov.