SQO-da mektep túlekteri UBT-ny alǵash ret elektrondy túrde tapsyryp jatyr

PETROPAVL. QazAqparat – Soltústik Qazaqstan oblysynda Ulttyq biryńǵaı testileýdiń ekinshi kezeńi elektrondy formatta ótip jatyr. Jańashyldyqty birinshi bolyp petropavldyq 17 oqýshy qoldandy, dep habarlaıdy QazAqparat tilshisi.

Mamandardyń aıtýynsha, UBT-ny elektrondy túrde tapsyrýdyń artyqshylyǵy kóp. Sonyń biri – testileýden ótetin ýaqytty jáne oryndy balalardyń ózderi tańdaıdy. Ári nátıjesin birden bile alady.

«Oqýshylar UBT-ǵa qatysý úshin onlaın tirkeledi. Eger buryn tirkelý úshin 5 qujat jınap, arnaıy ortalyqqa alyp kelip, sol jerden ruqsatnamany alatyn bolsa, qazir onyń bári qashyqtan atqarylady. Sondaı-aq buryn balalardy ortalyqtarǵa alyp keletin, qazir ózderi arnaıy kompıýter,

beınekameralarmen jaraqtandyrylǵan ortalyqtarǵa kelip tapsyrady.

Mysaly 2019 jyly eki kún ýaqytty alatyn úrdis qazir 3 mınýtta atqarylady», - deıdi QR BǴM Ulttyq testileý ortalyǵynyń dırektory Dıdar Smaǵulov.

Petropavlda búgin 17 oqýshy testileýden ótti. Solardyń biri – Albına Prıbolovets. Ol №13 orta mekteptiń 11-synyp oqýshysy.

«UBT-ny kompıýtermen tapsyrǵan anaǵurlym yńǵaıly. Sheńberdi boıap ýaqyt ketirmeısiń. Ári bergen jaýabyńa senimsiz bolsań qaıta oralyp, oılanýǵa múmkindik bar. Men búgin 82 ball aldym. Bul men úshin az. Sol sebepti taǵy bir ret múmkindikti paıdalanbaqshymyn», - deıdi Albına Prıbolovets.

UBT taza jáne ádil ótýin sybaılas jemqorlyqqa qarsy qyzmet jáne monıtorıngtik toptardyń ókilderi baqylaýǵa alǵan.

Jalpy SQO-da mektep túlekteri testileýden arnaıy jabdyqtalǵan úsh ortalyqta óte alady. Olar Taıynsha, Novoıshımka eldi mekenderinde jáne Petropavlda ornalasqan.

Bıyl óńirde mekteptiń 3405 túlegi bolsa, solardyń 2,5 myńy UBT tapsyrmaq. Al testileýdiń ekinshi kezeńi 10 sáýirge deıin jalǵasady.