SQO-da mektep oqýshysy quramynda 250 adamy bar izdeý jasaǵyn basqarady
Evgenıı Solovev 17 jasta ǵana. Petropavldaǵy 42 orta mekteptiń 11-synybynda oqıdy. Belsendi jas osydan eki jyl buryn SQO-nyń «Eń úzdik volonteri» atandy.
«12 jasymnan qoǵamdyq jumystarǵa belsendi qatysyp kelemin. Alǵashynda mektepte kontsert uıymdastyryp, synyp jetekshisine kómektestim. Keıin qaladaǵy is-sharalarǵa qatysa bastadym. Al volonterlikke sanaly túrde 13 jasymda keldim. Onda da kóbine uıymdastyrýshylyqpen aınalysatynmyn. Volonter retinde qatysqan jáne maqtanyshpen aıtatyn eń úlken is-sharam, ol Petropavlda 2018 jyly ótken QR jáne RF óńiraralyq yntymaqtastyq forýmy. Men onda volonterlik shtabty basqardym. Uıymdastyrýshylardyń birinshi kómekshisi boldym», - deıdi Evgenıı.
Bilimge, jańa nárseni tanyp-úırenýge qumar bozbala 2018 jyly Máskeýge baryp, áskerı topografııa jáne izdeý jumystary boıynsha oqý kýrsynan ótedi. Alǵan mashyǵyn óńirde qoldanyp, izdeý jasaǵyn qurady. Qazir onyń 250 múshesi bar.
«Jaqynda eki jasóspirim joǵalyp, olardy izdeýge alty jasar balasy bar kelinshek te shyqty. Búldirshin anasymen birge júrip baǵdar qaǵazdaryn japsyrýǵa kómektesti. 80-ge jaqyndap qalǵan volonter ájemiz bar. Ol kisi buryn da joǵalǵandardy izdeýge kómektesken eken. Qazir kóp júre almaıdy, biraq tátti shaı daıyndap, dámdi bálish pisiredi. Ol osylaısha kómek kórsetedi. Jalpy, qatarymyzǵa osy ispen aınalysýǵa yntasy bar barlyǵyn alamyz. Al 16 jastan kishi bolsa, mindetti túrde ata-anasynyń ruqsaty bar qolhat ákelýi kerek. Qyrkúıek aıynan bastap ıývenaldy polıtsııamen birge Petropavldaǵy ár mektepten tobymyzǵa adamdar alamyz. Bireý-mireý joǵalǵan ýaqytta olar izdeýge kómektesetin bolady. Jalpy bizdiń quramda negizinen oqýshylar men stýdentter, jumys isteıtin adamdar óte az», - deıdi volonter
Іzdeý otrıady ıývenaldy, krımınaldy polıtseılermen tyǵyz jumys isteıdi. Eki jyldyń ishinde volonterler qyryqtan astam adamdy izdep tabýǵa kómektesip, 100-den astam túrli aldyn alý is-sharasyn uıymdastyrǵan.
«Bizdiń negizgi jumysymyz – iz-tússiz ketkenderdi izdep tabý. Eger joǵalǵan adam bolsa polıtseıler bizge aqparat beredi. Eń aldymen týǵandarymen tildesip, málimet alamyz. Sosyn qala kóshelerine shyǵyp, ótken-ketkenderden surastyramyz. Áleýmettik jelini qoldanamyz. Іzdeý jumystarynan basqa, qoǵamdyq tártipti saqtaýǵa kómektesemiz. 18 jastan asqandar polıtseılermen birge kezekshilikke shyǵady. Esirtkige qarsy aktsııalarǵa qatysyp, jazbalardy boıaımyz. Qazir tótenshe jaǵdaı rejıminde de qol qýsyryp otyrǵan joqpyz. Emhanalarǵa kómektesip, zeınetkerlerge dári-dármekti úılerine aparyp beremiz. Qarajat jınap, muqtaj jandarǵa kerek-jaraqtaryn jetkizemiz. Demeýqarjy alatyndarǵa aqparattyq kómek kórsetemiz», - deıdi belsendi jas.
Evgenıı Solovevtiń aıtýynsha, olardyń jumysyndaǵy eń basty qıyndyq – qarjynyń joqtyǵy.
«Klýbqa eń keminde 4-5 ratsııa kerek, ormanǵa, izdeý jumystaryna baılanys quralynsyz jiberýge bolmaıdy. Bizde eń birinshi orynda qaýipsizdik bolýy tıis. Volonterlerge arnaıy keýdesheler tikkizý qajet. Bizge eshqandaı qarjy bólinbeıdi, bul - úlken másele. Bireýden kólik, bireýden volonterlerge tamaq, endi bireýinen avtobýs surap júrgenimiz. Ratsııany polıtsııadan surap alamyz. Bireýge kómektesý maǵan qatty unaıdy. Túrli adamdarmen qarym-qatynas ornatý arqyly jaqsy tájirıbe jınadym. Qazir kez kelgen adammen til tabysa alamyn. Iıa, bul jumys úshin aqsha tólemeıdi, qanshama máseleni sheshý de kóp kúshti qajet etedi. Biraq bul – tájirıbe. Men únemi jańa bir nársege úırengendi unatamyn. Osy eki jyldyń ishinde biraz jumys atqardyq. Kózge kórinbeıdi, biraq bizdiń maqsatymyz arzan ataq jınaý emes. Kóptegen qyzmettermen áriptestik memorandýmyna qol qoıdyq. Qazir Tótenshe jaǵdaılar departamentimen de jumysty bir jolǵa qoımaqpyz», - deıdi Evgenıı.
Belsendi, ári bilimdi jas psıhologııany jaqsy kóredi. Ol – halyqaralyq deńgeıdegi jattyqtyrýshy, túrli lektsııalar men semınarlardy, trenıngilerdi júrgizedi. Psıhologııa salasy boıynsha Nur-Sultan qalasynda Bilim jáne ǵylym mınıstrliginde jurt aldynda lektsııa oqyp, Balalardyń quqyqtaryn qorǵaý komıtetimen tyǵyz áriptestikte jumys isteıdi. Bıyl mektep bitiretin túlektiń endigi maqsaty bıyl M.Qozybaev atyndaǵy SQMÝ qujattaryn tapsyryp, oqýǵa túsý.
