SQO-da maldyń qıy kádege asatyn joba qolǵa alyndy
PETROPAVL. KAZINFORM – Soltústik Qazaqstan oblysy Mamlıýt aýdanyndaǵy sharýashylyqtardyń biri ekologııalyq jobany qolǵa alyp, maldyń qıynan organıkalyq tyńaıtqysh óndirýdi bastady.
Meńkeser aýylyndaǵy «Mámbetov jáne K» JShS egin egip, mal ósirýmen aınalysady. Endi sharýashylyq maldyń qıyn eginshilikte qoldanbaq.
Joba – «iri qara maldyń qıyn separatsııalaý» dep atalady. Túliktiń qıy azot, fosfor jáne kalıı sekildi hımııalyq elementterge baı. Tabıǵı tyńaıtqysh qoldanylǵan jerden nátıjesinde eki ese mol ónim alýǵa bolady eken.
Kásipker qajetti qondyrǵyny Túrkııadan 150 mln teńgege satyp alǵan. Qazir ol táýlik boıy jumys istep tur. Tehnıkany qashyqtyqtan basqarýǵa da bolady.
«Bizge osyndaı jobany júzege asyrý týraly oı 2 jyl buryn kelgen. Osy aralyqta tehnologııamen tanystyq. Qajetti aqparat jınadyq. Búgin sonyń nátıjesin kórip jatyrmyz. Іske qosyp, alǵashqy ónimimizdi alýdamyz. Bul tyńaıtqysh – 100% tabıǵı ónim. Eshqandaı hımııalyq qospa bolmaıdy. Aldymen ózimizdiń egistikterde topyraqty qunarlandyrý úshin paıdalanamyz», - deıdi «Mámbetov jáne K» JShS bas dırektory Oırat Nurmaǵambet.
Qondyrǵyny jetkizýshi kompanııa ókilderi sharýashylyqqa kelip, tehnıkany quryp berdi. Aıtýlarynsha, maldyń qıy 100% óńdeýden ótedi. Ekologııalyq jaǵynan da óte tıimdi. Innovatsııalyq joba SQO-da alǵash ret qoldanylyp otyr.
Buǵan deıin oblysta 1,2 myń ga egis alqaby sý astynda jatqanyn aıtqan edik.
