SQO-da qusbegilikten eresekter arasynda HVІІІ QR chempıonaty ótip jatyr
PETROPAVL. KAZINFORM – Soltústik Qazaqstan oblysynda 14 óńirdiń qusbegileri qatysqan el chempıonaty bastaldy, jarysqa 100-den astam qus qatystyrylyp jatyr.
Uıymdastyrýshylardyń aıtýynsha, Qyzyljar tórinde qusbegilikten QR chempıonaty ekinshi ret uıymdastyrylyp otyr. Bul joly jarys úsh dıstsıplına boıynsha ótip, sportshylar baptap ákelgen búrkit, qarshyǵa, ıtelgilerin qatystyrady.
- Soltústik óńirde ulttyq sport túrlerin, onyń ishinde qusbegilikti keńinen nasıhattaý maqsatynda ótkizilip otyr. Bul chempıonatty tarıhı jaǵdaı dep te aıtýǵa bolady. Óıtken júzden astam qus qatystyrylyp otyr. Sonyń ishinde 62-si – búrkit. Ár óńirden keldi, tanymal sportshylar da bar. Ókinishke qaraı chempıonat ótip jatqan SQO bul chempıonatqa qatysqan joq. Aqjar aýdanynda ǵana qusbegilik sport endi damyp kele jatyr. Otbasylyq jaǵdaıǵa baılanysty olar kele almady. Desek te, osyndaı chempıonattyń osy óńirde ótýi jastarǵa serpin beredi dep oılaımyz, - deıdi QR Sport jáne dene shynyqtyrý komıtetiniń Ulttyq jáne at sporty túrleri ortalyǵy dırektorynyń mindetin atqarýshy Qarlyǵash Ramazanova.
Chempıonat eki kúnge josparlanǵan.
- SQO-da qusbegilikke qatysty erekshe jyl. Aıyrtaý aýdany, Botaı eliniń týmasy ataqty búrkitshi Másil Batyrhanulynyń 140 jyldyǵy. HH ǵasyrdyń basynda el basyna kún týǵan kezde osy búrkitshilikpen biraz adamdy asharshylyqtan aman alyp qalǵan. Osy atamyzdyń izbasarlary áli de bolsa osy Soltústik jerinen shyǵady dep oılaımyn, - deıdi Qarlyǵash Ramazanova.
Jarysqa ár óńir keminde 3-4 qus ákeldi. Jeńisten úmittilerdiń biri – Jambyl oblysynyń qusbegileri.
- Jambyl oblysynan bes adam úsh qarshyǵa, eki búrkit ákeldik. Jarysqa daıyndyqpen keldik. Qusbegilikpen otbasymyzben aınalysamyz. 2008 jyly ákem bastady bul isti. Aldymen qarshyǵadan bastadyq. QR birneshe dúrkin jeńimpazy, Azııa chempıony boldyq. Jarysqa búrkit, qarshyǵamen qatysyp jatyrmyn. Jalpy bir jylda 6-7 jarys bolady, - deıdi qatysýshy Baqdáýlet Babajan.
Buǵan deıin SQO-da qusbegilikten eresekter arasynda ótip jatqan HVІІІ QR chempıonatyna kelgen búrkitshi Táttimbet Kápulyn áńgimege tartqan edik.