SQO-da qurbanǵa shalynatyn qoıdyń baǵasy - 50 myń teńge
Eldegi epıdemıologııalyq jaǵdaıǵa baılanysty qurbandy kópshilik meshitterde nemese arnaıy oryndarda shalmaıdy. Qurban2020.kz saıty arqyly shalatyn malǵa tapsyrys berýge bolady.
«Qurbandyq shalýǵa tapsyrys berý úshin saıtqa kirip, turatyn óńirińizdi, qala nemese aýdandy tańdaısyz. Ekinshiden aty-jónińiz ben uıaly telefonyńyzdy jazasyz. Maldyń túrin tańdap, qajetti somany bank shotyna aýdarasyz. Keıin qajet bolsa biz WhatsApp arqyly shalynǵan qurbandyq týraly esep beremiz», - deıdi oblystyq «Qyzyljar» ortalyq meshitiniń naıb ımamy Mýhammadzahır Mırzaev.
Bıyl meshit qyzmetkerleri soıylǵan mal etin tolyǵymen joq-jitikterge taratyp berýge usynys jasady.
«Qaýipti aýrýdyń taralýyna jol bermeý maqsatynda barlyq saqtyq sharalaryn qolǵa alamyz. Muqtaj jandarǵa mal etin volonterler taratady. Olardy qajetti medıtsınalyq maska, qorǵanysh kıimderimen qamtydyq. Búginge deıin saıt arqyly 20-ǵa jýyq adam qurban shalýǵa ótinish bildirdi. Bul – azyraq. Biraq qurban shalý Qurban aıttyń úsh kúnine jalǵasady. 3-4 sharýashylyqpen qoı, taǵy sonsha fermamen iri qara mal alýǵa kelistik», - deıdi naıb ımam.
SQO-da qurbanǵa shalynatyn toqtynyń baǵasy - 45 myń, qoı – 50 myń jáne iri qara mal - 300 myń teńge bolyp bekidi. Bul somaǵa qasapshynyń qyzmeti de kiredi.
«Qasapshylar qurban maldy soıý boıynsha byltyrlary arnaıy kýrstan ótti. Mal soıýǵa jibermes buryn olardy medıtsınalyq tekseristen ótkizemiz, dene qyzýyn ólsheımiz. Qurban shalý orny Petropavlda ornalasqan. Ol jerde veterınarlar, sanıtarııalyq dárigerler, jergilikti bılik ókilderi jáne polıtsııa qyzmeti kezekshilik atqarady», - deıdi Mýhammadzahır Mırzaev.
Búginde óńir meshitterine járdemge asa muqtaj 380 otbasy tirkelgen. Olardyń ázirshe qyryqqa jýyǵy Qurban aıtta mal etin alýǵa nıet bildirgen.
Aqerke Dáýrenbekqyzy
