SQO-da koronavırýs juqtyrǵandar sany bir aıda 6,3 ese ósti

PETROPAVL. QazAqparat – Soltústik Qazaqstan oblysynda bir aıdyń ishinde mobıldi toptar 11 myńnan astam shaqyrtýǵa barǵan. Óńirde KVI boıynsha aýrý kórsetkishi 6,3 ese artyp otyr, dep habarlaıdy QazAqparat tilshisi.

SQO ákimdiginiń otyrysynda búgin óńirdegi koronavırýs boıynsha jaǵdaı aıtyldy. Densaýlyq saqtaý basqarmasynyń basshysy Nurlan Aımanovtyń aıtýynsha, jyl basynan qaýipti ınfektsııanyń kúrt óskeni baıqalady.

Máselen 8 qańtardan bastap jedel járdem qyzmeti 21 myńǵa jýyq shaqyrtýǵa barǵan. Bir brıgadaǵa artylǵan júkteme 23-25 shaqyrtýǵa jetken.

«Aýyrǵandar sanynyń artýyna baılanysty mobıldi toptar 54-ten 116-ǵa deıin kóbeıtildi. Basqarmalar men aýdan ákimdikteriniń kómegi arqasynda bul jumys der kezinde atqaryldy. Qazir bir mobıldi top táýligine 19-22 shaqyrtýǵa barady. Jeltoqsan aıynda 2951 shaqyrtý bolsa, ótken aıda onyń sany 11 126-ǵa jetti. Onyń 393-inde pnevmonııa, 6 338-inde jedel respıratorlyq vırýstyq ınfektsııa bolǵan. Syrqattanǵan turǵyndar emhanalarda ashylǵan Call ortalyqtarǵa da habarlasa alady. 21 ortalyqta 71 adam jumys isteıdi. Kúndelikti 3 myńǵa jýyq qońyraý qabyldanady. Olardyń mindeti syrqattardyń emin baqylaýda ustaý, nasharlaǵan jaǵdaıda mobıldi toptardy jiberý. 8 qańtar men 8 aqpan aralyǵynda 63 136 qońyraý qabyldanǵan, salystyrý úshin aıtaıyq, jeltoqsanda mamandarǵa 17 myń qońyraý shalynǵan», - deıdi Nurlan Aımanov.

Jalpy ambýlatorlyq syrqattardyń sany 6,3 esege ósip, 3 899-ǵa jetken. Naýqastar kóbeıgenimen statsıonarlardaǵy adam sany 2,7 ese ǵana artty.

Jeltoqsan aıynda 168 syrqat bolsa, qazir 450 adam em alyp jatyr. Mamannyń aıtýynsha, statsıonarlarǵa kúndelikti 50-60 adamnan túsedi.

«Qazirgi ýaqytta 22 syrqattyń jaǵdaıy aýyr. Bul barlyq jatqyzylǵan naýqastardyń 5 %-y. 204 syrqat medıtsınalyq ottegige táýeldi. Jyl basynan KVI-den 29 adam qaıtty. Jeltoqsanda qaıtys bolǵandardyń sany – 65», - deıdi Nurlan Aımanov.