SQO-da qonys kolonııadan qashqan adam izdestirilip jatyr
PETROPAVL. KAZINFORM – Soltústik Qazaqstan oblysyndaǵy Olshanka eldi mekeninde ornalasqan qonys kolonııasynan jazasyn ótep jatqan er adam qashty.
Sottalǵandy izdestirýge qylmystyq-atqarý júıesi departamentiniń jáne mekeme qyzmetkerleri jumyldyryldy.
Bul aqparat aldymen WhatsApp messendjerinde tarady. Baǵdar berý anyqtamasynda er adamnyń 4,5 jyly urlyq úshin sottalǵany jazylǵan. 2026 jyly jeltoqsanda jazasyn ótep shyǵýy tıis edi.
SQO qylmystyq-atqarý júıesi departamentiniń baspasóz qyzmeti aqparatty rastady.
«Sottalǵan adam jumys istep júrgen nysannan qonys kolonııasyna oralmady. Eń tómengi qaýipsizdik mekemelerinde jazasyn óteýshiler kolonııadan tys jerde jumys isteıdi, jumys ýaqyty aıaqtalǵannan keıin qaıtarylady. Sottalǵan belgilengen baǵyttan aýytqyp, qaıtyp kelmedi. Bul úshin QR Qylmystyq kodeksi negizinde jaýapkershilik kózdelgen. Oǵan zańnamaǵa sáıkes shara qoldanylatyn bolady», - delingen baspasóz habarlamasynda.
Buǵan deıin SQO-da bir otbasynyń astan ýlanyp, eki balanyń qaıtys bolǵanyn aıtqan edik.
