SQO-da kómir baǵasy ózgerdi

PETROPAVL. KAZINFORM – Soltústik Qazaqstan oblysynda kómirdiń jetkilikti qory bar. 

Jylytý maýsymynyń aldynda kómir defıtsıtin boldyrmaý úshin SQO-ǵa qyrkúıek aıynda ǵana 862 vagon túrli markaly kómir jetkizilmek. Bul týraly oblystyq energetıka jáne turǵyn úı-kommýnaldyq sharýashylyq basqarmasy málimdedi. Petropavldaǵy tuıyqtarda qazir 2 284 tonna, aýdandarda 53 myń tonna qatty otyn jatyr. 

– Oblys boıynsha kómir satatyn 35 oryn bar, 44 kásipker aınalysady. Turǵyndarǵa jylytý maýsymyna 409 myń tonna kómir qajet bolsa, qazir sonyń 267 myń tonnasyn nemese 65%-yn túsirip aldy. Bıýdjettik uıymdar tolyq qamtyldy, - deıdi basqarma basshysynyń orynbasary Qýandyq Shaqýbaev.

Turǵyndar arasynda Shubarkól men Qarajyra kómirine suranys joǵary. Bulardyń baǵasy da basqalaryna qaraǵanda qymbat. 18 myń teńgeden bastalyp, 25 myń teńgege deıin jetedi. 

– Ótken jylmen salystyrǵanda kómir baǵasy ósip otyr. Ekibastuz kómiri – 5,6%, Shubarkól – 15,6%, Qarajyra – 13,5%, Maıkóbe kómiri 12,7%-ǵa ósti. Baǵaǵa kómir jatqan tuıyqtyń ornalasýy da áser etedi, - deıdi Qýandyq Shaqýbaev.

Basqarmanyń málimetinshe, qazir óńirge 154 vagon kómir kele jatyr. Jalpy osy aıda 862 vagonmen 59 tonna túrli markaly kómir jetkizilmek. 

Petropavldaǵy 2-Jylý-elektr ortalyǵy da otynmen jetkilikti deńgeıde qamtylǵan. Qazir munda 18 táýlikke jetetin 96,5 myń tonna kómir jáne 99 táýlikke jetetin 1 092 tonna mazýt bar. 

Buǵan deıin elimizde kómir óndiretin 30 kásiporynda 32 myńnan asa adam eńbek etetinin jazǵan edik.