SQO-da kommýnıster aýlalardy abattandyrý máselesin kóterdi

PETROPAVL. QazAqparat – Petropavlda Soltústik Qazaqstan oblysyndaǵy turǵyn úı-kommýnaldyq sharýashylyqty reformalaý taqyrybynda dóńgelek ústel ótip, jergilikti atqarýshy organdar men úkimettik emes uıym ókilderi ózekti máselelerdi talqyǵa saldy, dep habarlaıdy QazAqparat tilshisi.

Jıyndy uıymdastyrýshy – Qazaqstan kommýnıstik halyq partııasynyń SQO fılıaly. Іs-sharaǵa partııanyń belsendileri, Petropavl qalalyq ákimdiginiń jáne úkimettik emes uıym ókilderi qatysty.

Dóńgelek ústelde bas qosqandar shahardy kógaldandyrýǵa, júrgizilip jatqan qurylysqa qatysty óz pikirin bildirdi.

«Biz osyndaı dóńgelek ústelderdiń birnesheýin ótkizýdi josparlap otyrmyz. Bul - alǵashqysy. Maqsatymyz – másele kóterý, oǵan bıliktiń nazaryn aýdartyp, birlese otyryp sheshý mehanızmderin tabý. Qaı qalada bolmasyn turǵyn úı-kommýnaldyq sharýashylyq máseleleri jetkilikti, óıtkeni ınfraqurylym eskirgen. Biz bul kezdesýde tek qana abattandyrýdy sóz ettik», - deıdi QKHP SQOF birinshi hatshysy Sergeı Martemıanov.

Partııa ókiliniń aıtýynsha, Petropavlda abattandyrý máselesine, ásirese, bıyl asa kóńil bólindi. Jyl sońyna deıin shaharda jańadan 90-ǵa jýyq saıabaq pen gúlzar paıdalanýǵa berilmek.

Aýlalar jónge keltirilip, asfalt tóselip jatyr. Tek bıyl turǵyndarǵa kólik qoıýǵa 45 avtoturaq jaraqtandyrylmaq. Bul jumystyń basym bóligi atqaryldy.

«Men 2003-2011 jyldar aralyǵynda Petropavl qalalyq máslıhatynda depýtat boldym. Sol sebepti halyqtyń muń-muqtajy maǵan jaqsy tanys. Turǵyndar kezdesýlerde aýlany abattandyrýdy suraıtyn, kólik qoıatyn orynnyń, balalar alańdarynyń joqtyǵyn aıtatyn. Munyń bári birtindep sheshilip jatyr. Biraq máseleni birden sheshý múmkin emes. Búgin qalalyq ákimdiktiń ókili jıynǵa qatysyp, turǵyndardyń aryz-tilekterinen qurylǵan málimetter bazasynyń bar ekenin aıtty. Sondaı-aq saıtqa kirip qaı aýlanyń qashan jóndeletinin bilýge bolady eken, bul jaqsy ǵoı», - deıdi Sergeı Martemıanov.

Kezdesýge qatysýshylar óz usynystaryn da bildirdi. Máselen, úkimettik emes uıymdardyń biri – kógaldandyrýdy mekemelerge bólip berý qajet degen pikirde.

Olar tal otyrǵyzyp qana qoımaı, ony kútip-baptaýdy da ózderi atqarýy qajet.