SQO-da qysta qaıda demalýǵa bolady
Soltústik Qazaqstan oblysynda Imantaý-Shalqar kýrorttyq aımaǵynda 46 týrızm nysany ornalassa, sonyń toǵyzy týrısterdi qys ýaqytynda da qabyldaýǵa ázir.
SQO kásipkerlik jáne ındýstrııalyq-ınnovatsııalyq damý basqarmasynyń málimetinshe, Aıyrtaý aýdanyndaǵy qysqy demalys bazalary bir mezgilde 916 týrısti qabyldaý múmkindigi bar. Mundaǵy sulý tabıǵat demalýshylardy ǵana emes, sonymen qatar sońǵy jyldary týrızm salasynda eńbek etip júrgen kásipkerlerdi de qyzyqtyryp, kýrorttyq aımaqtyń tanymaldyǵy artyp keledi.
- Qysta óńirge kelgen týrıster Qarasaı men Aǵyntaı batyrlarǵa arnalǵan memorıaldyq keshenge, Aıǵanym qonysyna jáne Syrymbet aýylyndaǵy Sh.Ýálıhanov atyndaǵy tarıhı-etnografııalyq mýzeıge, Botaı qonysyna baryp, aralaı alady.
«Solnechnyı Vıp» demalys orny jyl boıyna emdeý-saýyqtyrý qyzmetin kórsetedi. Onyń ishine panta vannasy, panta bóshkesi, fıtobóshke, fıto-, tuzdy vanna, galokamera, ıngalıatsııa, aıaqtyń gıdromassajy, aromaterapııa, bal qosylǵan dárýmendi shaı kiredi. Sonymen qatar, qaraǵaıly ormanda shańǵy tebýge jáne serýendeýge bolady. Monsha men saýna da bar, - deıdi basqarma basshysy Darhan Ámrın.
Áýesqoı balyqshylar úshin Shalqar jáne Imantaý kólderi taptyrmas oryn. Mamannyń aıtýynsha, olar bul jerge otbasymen kelip, demalysty qyzyqty ótkize alady.
- Kýrorttyq aımaqta «Izýmrýdnoe», «Turpan», «Kól jaǵasyndaǵy úı», «Adam», «Adel», «Qazyǵurt», «Imantaý», «Zarıa» demalys bazalary jáne «Zeınep» kópsalaly kolledji qyzmetterin usyna alady.
Olardyń ishinde Shalqar kóliniń jaǵasynda ornalasqan «Izýmrýd» demalys aımaǵyn atap ótýge bolady. Bul ortalyq 100 oryndyq, 120 oryndyq meıramhana, 3 monsha bar. Shańǵy jáne konkı teýip, tıýbıngpen syrǵanaý úshin, aeroshana, kvadrotsıkldermen serýendeý úshin jaqsy jaǵdaı jasalǵan.
Imantaý kóliniń jaǵasynda ornalasqan «Adel» oıyn-saýyq ortalyǵy 105 adamdy qabyldaı alady. Kelgen qonaqtarǵa 60 oryndyq dámhana jumys isteıdi, monsha bar, kólde muzdaı sýǵa túsetinder úshin arnaıy oryn jaraqtandyrylǵan. Munda da belsendi demalysty jaqsy kóretinder qaraǵaıly ormanda kvadrotsıkl, aeroshańǵymen serýendep, konkı jáne shańǵy tebe alady, - deıdi Darhan Ámrın.
Bıyl Aıyrtaý aýdanynda qysqy týrızm nysandarynyń sany ekeýge artyp otyr. Endi óńir turǵyndary men qonaqtar Aqkól kóliniń jaǵasyndaǵy jańa «Zarıa» demalys bazasynda da demala alady. Nysan 50 adamǵa arnalǵan. Lobanovo aýylynda «Zeınep» kópsalaly kolledji de qonaqtardy qarsy alýǵa daıyn. Munda 27 qonaqúı bólmesi bar, tamaqtandyrý qarastyrylǵan.
Petropavlǵa kelgen meımandar elıtalyq otbasylyq «Green park» qonaq úı-saıabaǵynda demalysty ótkize alady. Saıabaq aýmaǵynda premıým-klasty: 5 bir qabatty, 3 eki qabatty, 3 shale bar. Qysta jyly besedkalar, kvadro-monsha, karaokesi bar saýyqtyrý monshasy bar. Demalýshylar káýap qýyryp, jylytylatyn basseınde sýǵa shomyla alady. Qonaqtarǵa yńǵaıly bolý úshin 2 úlken ashyq basseın salynǵan. Tóbeshikten syrǵanap, shańǵy tebýge bolady. Ponımen, haskı ıtterimen serýendeýge bolady.
- Byltyr «Kókshetaý» memlekettik ulttyq tabıǵı parkiniń bas josparyn bekitti. Qazir ulttyq park aýmaǵynda jer ýchaskelerin alǵan 16 ınvestor jyl boıy jumys isteıtin zamanaýı eko-qonaqúıler men glempıngter salý maqsatynda jobalyq-smetalyq qujattamalar ázirlep jatyr. Osy maqsatqa 3,7 mlrd teńge ınvestıtsııa tartylmaq. Jobany 2025-2026 jyldary iske asyrý josparlanǵan. Osylaısha, týrıster jyl boıy demalatyn nysandardyń sanyn ulǵaıtý jáne usynylatyn qyzmet spektrin keńeıtý mindeti tur, - deıdi basqarma basshysy.