SQO-da qyrkúıek aıynda aýa raıy qandaı bolmaq
PETROPAVL. KAZINFORM – Soltústik Qazaqstan oblysynda sınoptıkter kúzdiń alǵashqy aıy – qyrkúıektegi aýa raıy boljamyn jarııalady.
«Qazgıdromet» kásiporny oblystyq fılıalynyń málimetinshe, aı boıy jyly men sýyq temperatýra almasyp turmaq. Soltústikten kelgen sýyq aýa aǵyndary saldarynan túngi ýaqytta úsik júrýi múmkin.
Aılyq ortasha temperatýra +10,0…+12,1°S shamasynda boljanyp otyr. Bul kópjyldyq normaǵa (+10,7…+11,6°S) jýyq kórsetkish.
- Birinshi onkúndikte túnde aýa temperatýrasy +1…+6°S-tan +6…+11°S-qa deıin aýytqyp, kúndiz +13…+18°S-tan +18…+23°S aralyǵynda bolady.
Ekinshi onkúndiktiń alǵashqy kúnderi jyly bolady, túnde +2…+7°S-ten +7…+12°S-qa, kúndiz +14…+19°S-ten +19…+24°S-qa deıin kóteriledi. Keıinirek salqyndap, túnde 0…+5°S, topyraq betinde –3°S-qa deıin úsik, kúndiz +12…+17°S bolady, - deıdi mamandar.
Sınoptıkterdiń aıtýynsha, úshinshi onkúndikte de salqyn aýa raıy basym bolmaq: túnde +3…+8°S-tan 0…+5°S-qa deıin jáne –3°S-qa deıin sýytyp, úsik kútiledi. Kúndiz aýa temperatýrasy +17…+22°S-tan +9…+14°S-qa deıin tómendeıdi.
Al jaýyn-shashynǵa keler bolsaq, qyrkúıek aıynda jyldaǵy normaǵa sáıkes - 22–34 mm shamasynda jáne keı jerlerde normadan kóp bolýy yqtımal. Jańbyrly kúnder jıi bolyp, jeldiń ekpini 15–20 m/s deıin jetedi. Sonymen qatar, aıdyń alǵashqy onkúndiginde naızaǵaı oınap, al qyrkúıektiń birinshi jartysynda jıi tuman túsedi dep boljanǵan.
Buǵan deıin Qazaqstannyń basym bóliginde daýyldy eskertý jarııalanǵanyn jazǵan edik.