SQO-da keıingi 3 jylda AITV juqtyrǵan áıelder 30-dan astam balany dúnıege ákelgen

PETROPAVL. KAZINFORM – Soltústik Qazaqstan oblysynda keıingi 3 jylda adamnyń ımmýn tapshylyǵy vırýsynyń anadan balaǵa berilý jaǵdaılary tirkelgen joq. Osy ýaqyt ishinde AITV juqtyrǵan áıelder 30-dan astam balany dúnıege ákeldi. 

JITS profılaktıkasy jáne oǵan qarsy kúres jónindegi SQO ortalyǵy baspasóz qyzmetiniń málimetinshe, jyl saıyn 1 jeltoqsanda búkil álemde JITS-ke qarsy kúres kúni atap ótiledi. Osyǵan oraı elimizde 20 qarasha men 1 jeltoqsan aralyǵynda Dúnıejúzilik JITS-ke qarsy kúres naýqany ótedi. Ondaǵy basty maqsat – AITV-nyń aldyn alý, halyqty testileýden ótýge shaqyrý, AITV-ǵa baılanysty emdelýdiń mańyzdylyǵyn jáne AITV juqtyrý qaýpi bar nemese AITV-men ómir súretin adamdarǵa qatysty kemsitýshilikke jol bermeýdi eske salý. 

SQO-da AITV-men ómir súretin 1 428 adam esepte tur. 2024 jyldyń 10 aıynda 100 jańa jaǵdaı anyqtaldy, bul 2023 jyldyń uqsas kezeńinen 16 jaǵdaıǵa az. Soltústik Qazaqstan oblysy AITV taralýy boıynsha el reıtınginde 7-orynda tur. 

Mamandardyń aıtýynsha, AITV óńirde eki jolmen: 34,7% – ınektsııalyq psıhoaktıvti zattardy birlesip qoldaný arqyly parenteraldi jolmen jáne 61,2% – jynystyq jolmen beriledi.

Oblystyń medıtsınalyq uıymdarynda AITV-ınfektsııasyn juqtyrýdyń jaǵdaılary tirkelgen joq. 

Júkti áıelderge medıtsınalyq kómek kórsetý, turaqty tekserýler jáne antıretrovırýstyq terapııany qabyldaý – AITV-ınfektsııasyn anadan balaǵa berilýin boldyrmaýǵa múmkindik berdi. 

2009 jyldan bastap Qazaqstanda antıretrovırýstyq terapııa engizilip, ol medıtsınalyq kómektiń kepildik berilgen kólemi aıasynda memlekettik qarajat esebinen tegin júrgiziledi.

«AITV juqtyrǵandarǵa antıretrovırýstyq terapııany qabyldaýdyń mańyzdylyǵy týraly patsıentter arasynda úlken túsindirý jumystary júrgizilip keledi. Nátıjesinde emdelýge degen umtylys jyl saıyn artyp keledi. Mınımaldy janama áseri bar antıretrovırýstyq preparattarynyń jańa býynynyń paıda bolýy da buǵan áser etip jatyr. Búginde oblysta AITV-men esepte turǵandardyń 89%-y antıretrovırýstyq preparat qabyldaıdy. Ótken jyldyń uqsas kezeńimen salystyrsaq, byltyr kórsetkish aımaq boıynsha 85,4%-dy qurady, ıaǵnı patsıentterde emdelýge degen ynta bar. Biz osy baǵytta jumysty jalǵastyryp jatyrmyz», - deıdi ortalyq dırektory Rınat Ýlmesekov.

Buǵan deıin SQO-da qyzylshamen aýyrǵandar sany 14 ese artqanyn jazǵan edik.