SQO-da qaı synyptyń oqýshylary mektepke baryp bilim alady

PETROPAVL. QazAqparat – Soltústik Qazaqstan oblysynda koronavırýs boıynsha jaǵdaıdyń turaqtanýyna baılanysty 1-5 synyp oqýshylaryna mektepterde oqýǵa ruqsat berildi, dep habarlaıdy QazAqparat tilshisi.

SQO bilim basqarmasynyń jetekshisi Gúlmıra Kárimova brıfıngke qatysyp, koronavırýs ınfektsııasy boıynsha jaǵdaıdyń turaqtanýyna baılanysty bilim berý protsesine engizilip otyrǵan ózgerister jaıynda aıtty.

«Bul ózgerister 2 naýryzdan bastap engiziledi. Erteńnen bastap 1-5 synyp aralyǵyndaǵy oqýshylar burynǵydaı kezekshi synyptarda ǵana emes, tolyq oqıdy. Ata-analardyń ótinishi boıynsha bala nemese ata-ana, jaqyn týystarynyń biri aýyrǵan jaǵdaıda oqýshyny qashyqtan oqýǵa kóshirýge bolady. Jalpy mektepterdiń jumysy birtindep qalpyna kelip jatyr. Oqýshylar sany 30 % aspaýy qajet. Qajet bolǵan jaǵdaıda eki aýysymda oqıtyn bolady», - dedi Gúlmıra Kárimova.

300-ge deıin oqýshysy bar qala jáne aýyl mektepteri jáne mektep bitiretin 9 jáne 11-synyp oqýshylary burynǵysynsha dástúrli formatta oqı beredi.

Olar úshin pánderdiń 70 %-y shtattyq rejımde, qalǵany qashyqtan oqytylady.

Synyptaǵy bala sany 15-ten aspaýy kerek.

«Sondaı-aq arnaıy mamandandyrylǵan mektepterge dástúrli formatta oqýǵa ruqsat berildi. Sanıtarlyq talaptar qatań saqtalýy qajet. Balalardyń mektep formasyna keletin bolsaq – olar yńǵaıly, klassıkalyq stılde kıinýleri qajet. Al 6,7,8,10-synyp oqýshylary sabaqty qashyqtan oqýdy jalǵastyrady», - dedi basqarma jetekshisi.