SQO-da kásiporyndardy zańsyz teksergender jazalandy
PETROPAVL. KAZINFORM — Soltústik Qazaqstan oblysynda sońǵy eki jylda ınvestorlardyń jalpy somasy 462 mlrd teńgege jýyq otyzdan astam máselesi sheshildi.
SQO prokýratýrasynyń málimetinshe, ekologııa departamenti «Soltústik broıler» qus fabrıkasy» JShS jospardan tys tekseris júrgizbek bolǵan. Investor prokýratýraǵa shaǵymdanyp, zertteý nátıjesinde vedomstvonyń tekserýdi taǵaıyndaýǵa negizi joqtyǵy anyqtaldy.
Aıyrtaý aýdanynda polıtsııa qyzmetkerleri tekserý taǵaıyndaý jáne ony tirkeý týraly akt shyǵarmaı, «Arqa sanatorııi» AQ ınvestorynda kóshi-qon tekserýlerin zańsyz júrgizgen. Prokýrorlardyń aktisi boıynsha polıtsııanyń 3 laýazymdy tulǵasy tártiptik jaýapkershilikke tartyldy.
— Investorlardyń quqyǵyn qorǵaýda «prokýrorlyq fıltr» engizildi. ıAǵnı memlekettik organ prokýrordyń kelisiminsiz ınvestordy tekserýge, onyń qyzmetin toqtatýǵa, lıtsenzııalaryn qaıtaryp alýǵa jáne ózge de shekteýler qoıýǵa quqyǵy joq.
Osy «fıltr» aıasynda biz tekserý, ákimshilik jaýapkershilikke tartý jáne shekteý sharalaryn qoldaný týraly 31 zańsyz sheshimniń aldyn aldyq.
Mysaly, Mamlıýt jáne Taıynsha aýdanynyń salyq organdary zańdy negiz keltirmeı jáne naqty kásipkerlik sýbektilerin kórsetpeı taqyryptyq tekserýler júrgizýdi josparlaǵan, — deıdi SQO prokýrorynyń birinshi orynbasary Ábý Álı Sattar.
Qadaǵalaý aktileri boıynsha salyqtyq tekserýlerdi negizsiz josparlaý faktileri boıynsha 3 laýazymdy tulǵa jazalandy.
— Zańnamalyq ózgerister kásipkerlik jáne azamattyq is júrgizý kodeksterine, sondaı-aq ÁQBtK-ge engizildi jáne osy jylǵy qańtarda qoldanysqa engizildi. Atap aıtqanda, endi prokýrormen keliskennen keıin ǵana ınvestorǵa qatysty ákimshilik quqyq buzýshylyq týraly is qozǵaýǵa bolady. Prokýrordyń kelisimi bolmaǵan jaǵdaıda ol is júrgizýdi toqtatýǵa negiz bolady. Kásipkerlik Kodekske engizilgen ózgerister memlekettik organdarǵa prokýrordyń kelisiminsiz ınvestorlardy tekserýge tyıym salýdy kózdeıdi. Azamattyq is júrgizý kodeksinde de ózgeris bar. Endi memlekettik organ ınvestordy sotqa bermes buryn ony prokýrormen mindetti túrde kelisýi qajet, — deıdi prokýror.
Óńir prokýratýrasy 85 ınvestjobany baqylaýǵa alǵan.
Buǵan deıin SQO-da bıyl sapasyz medıtsınalyq qyzmetke qatysty 100-ge jýyq shaǵym túskenin jazǵan edik.