SQO-da kásipkerlerdiń quqyǵy jıi buzylatyn salalar anyqtaldy

PETROPAVL. QazAqparat – Soltústik Qazaqstan oblysynda quqyq qoldaný praktıkasyna taldaý júrgizilip, bıznestiń júıeli máseleleri anyqtaldy. Sonyń ishinde kásipkerlerdi negizsiz sotqa tartyp, zańnamalyq rásimderdi jıi buzatyn memlekettik organdar belgili boldy, dep habarlaıdy QazAqparat tilshisi.

SQO kásipkerler palatasy baspasóz qyzmetiniń málimetinshe, oblystyq prokýratýrada bıznesti qorǵaý ekojúıesin damytý jáne tartymdy bıznes-klımatty qalyptastyrý máseleleri jónindegi jumys tobynyń qorytyndysy shyǵaryldy.

«Bıznesti qorǵaýdyń ekojúıesi» - bul memlekettik organdardyń, advokattyq jáne zań qoǵamdastyqtarynyń, «Atamekenniń» birlesken jumysy nátıjesinde jedel jáne strategııalyq mindetterdi sheshýge baǵyttalǵan Ulttyq palatanyń jańa jobasy.

«Bıylǵy jarty jyldyqta kásipkerlerdiń qatysýymen bolǵan isterdi saralap, jumys toby daýlardy jıi sotqa deıin aparatyn salalardy anyqtady. Máselen, jer qatynastary salasynda sottyń 7 sheshiminiń 4-i jer komıssııasynyń hattamalyq sheshimin zańsyz dep taný jáne onyń kúshin joıý týraly, ne jer komıssııasynyń hattamalyq sheshiminiń zańsyzdyǵyna baılanysty ákimdik qaýlylarynyń kúshin joıý jaıynda boldy. Daýly hattamalyq sheshimderdi jer komıssııasynyń oǵan quqyǵy joq quramy shyǵardy, al aýdıo, beınejazbalardan jáne otyrys hattamalarynan konkýrsqa qatysýshylarǵa upaılardyń qalaı berilgeni múldem túsiniksiz. Nashar dybys, jer komıssııasy músheleriniń bet-álpeti anyq kórinbeıdi, sondaı-aq barlyq múshelerdiń daýys berý nátıjeleri joq. Sonymen qatar, beınejazba toqtatylady, úziledi, al jer komıssııasy otyrysynyń barysy týraly aýdıo, beınejazba úzdiksiz júrgizilýi kerek. Sondyqtan jer komıssııasynyń jer ýchaskelerin berý týraly sheshimi zańsyz dep tanyldy», - deıdi SQO Kásipkerler Palatasy dırektorynyń orynbasary Jeńis Qazıev.

Bul zańbuzýshylyqtar úshin sot memlekettik organdarǵa qatysty jeke uıǵarymdar shyǵardy. Al sybaılas jemqorlyqqa qarsy organdarǵa óńirdegi jer komıssııalarynyń qyzmetine taldaý júrgizý, al jergilikti atqarýshy organdarǵa jer zańnamasy salasyndaǵy talaptardyń tıisinshe oryndalýyn erekshe baqylaýǵa alý usynyldy.

Salyqtyq quqyq buzýshylyqtar salasyna keletin bolsaq, kameraldyq baqylaý nátıjeleri boıynsha anyqtalǵan zańbuzýshylyqtardy joıý týraly habarlamalardy oryndaý máselelerine qatysty daýlardyń ósýi baıqalady.

«Kameraldyq baqylaý nátıjeleri boıynsha Memlekettik kirister organdary anyqtaǵan olqylyqtardy joıý týraly habarlamany oryndalmady dep taný týraly sheshim shyǵarýdy salyq organdary tájirıbege engizgen. Kásipker habarlamamen kelispegen jaǵdaıda tıisti túsinikteme berýge quqyly. ıAǵnı, mundaı jaǵdaıda habarlama oryndaldy dep tanylyp, onyń qoldanylýyn toqtatý kerek, al salyq organy jospardan tys tekserýdi taǵaıyndap, anyq-qanyǵyna jetýi tıis. Alaıda, memlekettik kirister organdarynyń qoldanystaǵy tájirıbesi salyq tóleýshilerdi sotta habarlamanyń oryndalýyn dáleldeýge májbúrleıdi, osylaısha jumysyn tejeıdi», - deıdi Jeńis Qazıev.

Ákimshilik quqyqbuzýshylyqtardy taldaý kóptegen júıeli máseleni anyqtaýǵa múmkindik bergen. Máselen memlekettik tekserýshi organdar «eskertý» sııaqty ákimshilik jazany umytyp, birden kásipkerlerge aıyppul salatyn bolǵan.

Júrgizilgen taldaýlar nátıjesinde kináli laýazymdy tulǵalar jaýapqa tartylyp, anyqtalǵan barlyq júıelik problemalar egjeı-tegjeıli zerdelenedi.

Oblys prokýrorynyń orynbasary Murat Qojamqulov bızneske zańsyz aralasýdyń barlyq jaǵdaılarynda, ádette, oryndaýshylar men kelisim boıynsha jumys isteıtinder jaýapqa tartylatynyna erekshe nazar aýdardy. Bul durys emes, zańbuzýshylyqtarǵa jol bergen basshylardy jazalaý tájirıbesin engizý qajet.

Óńirde bıznesti qorǵaýdyń ekojúıesin damytý basymdyqqa ıe bolady, osy baǵyttaǵy birlesken jumys jalǵaspaq.