SQO-da qasaqana alıment tóleýden jaltarǵandardyń boryshy 250 mln teńgeden asady
PETROPAVL. KAZINFORM – Soltústik Qazaqstan oblysynda alıment tóleýden qasaqana jaltaryp júrgen 40 adam qylmystyq jaýapkershilikke tartylmaq. Balasyna aqsha qımaı, biraq býkmekerlik keńse jaǵalap júrgen olar birer jylda 500 mln teńgege oınaǵan.
SQO prokýrorlary vedomstvoaralyq jumys keńesin ótkizip, 10 aıda alımentti óndirip alý boıynsha atqarylǵan jumysty qorytyndylady.
«SQO-da aı saıyn 9 myńnan astam bala alıment alady. 174 adam qasaqana alıment tóleýden jaltaryp júr. Jaqynda prokýratýra býkmekerlik keńselerdi tekserdi, boryshkerler qatarynda júrgen 40 adam utysqa aqsha tigip kelgen. Boryshkerler SQO boıynsha jalpy somasy 500 mln teńgeni osy býkmekerlik keńselerde qaldyrǵan. Máselen bireýi býkmekerlik keńsede 50 mln teńge utylǵan. Indraıver, ıandeks taksılerdi de tekserdik. Alıment tóleýden qashyp júrgenderdiń biri belgili bir aralyqta 2 mln teńge tabys tapqan», - deıdi oblys prokýrorynyń birinshi orynbasary Abý-Alı Sattar.
Qazirgi ýaqytta boryshkerlerdiń ortaq bereshegi 250 mln teńge shamasynda.
«Sot oryndaýshylary óz jumysyn tıisti deńgeıde oryndamaıdy. Ótken aptada ádilet departamenti basshysyna usynys jiberdik. Qazirgi ýaqytta qyzmettik tekseris júrip jatyr. Kináliler tıisti jazasyn alady. Al anyqtalǵan 40 boryshkerdi qylmystyq jaýapkershilikke tartamyz. Jalpy jyl basynan beri óńirde 12 adam qylmystyq jaýapkershilikke tartyldy. Jaqynda ǵana bir úkim shyqty. Bul bap boıynsha 2 jylǵa deıin bas bostandyǵynan aıyrý jazasy qarastyrylǵan. Biraq sot kóbine boryshkerlerdiń bostandyǵyn shekteıdi. Budan bólek ákimshilik jaýapkershilik bar. Bıyl 80 adamdy jazaladyq, olardyń 90% qamaýǵa alyndy, ıaǵnı 5-10 táýlikke qamaldy», - deıdi prokýror.
Bir jylǵa bostandyǵy shektelgen Petropavl turǵynynyń alıment boıynsha 4,6 mln teńge qaryzy bar. Prokýrorlardyń úılestirý sharalary nátıjesinde alıment boıynsha 110 mln teńge bereshek óteldi.
«Boryshkerler tabysyn jasyrý úshin túrli aıla-tásilge barady. Jaqynda vedomstvoaralyq keńes ótip, bizge osyndaı alıment tólemeýshilerdi anyqtaý mehanızi berildi. Prokýratýra anyqtaǵan faktiler boıynsha jumys istep, olardan aqshany óndirip alý jáne qylmystyq, ákimshilik jaýapkershilikke tartý úshin jınap jatyrmyz. Sondaı-aq býkmekerlik ortalyqtarǵa qandaı da bir qaryzy barlardyń tizimin jiberip, olardyń qumar oıyn oınaýyna tyıym salyndy, akkaýnttary da buǵattaldy. Mundaı jumys elektrondy aqsha, ámııanmen de júrgiziledi. Bolashaqta krıtpoaktıvterdi buǵattaýdy da qolǵa alamyz dep oılaımyn. Óıtkeni bul da tabysty jasyryp, jaýapkershilikten ketýdiń bir joly», - deıdi aımaqtyq jeke sot oryndaýshylar palatasy basshysynyń orynbasary Arman Qusanov.
Buǵan deıin SQO-da paramen ustalǵan 2 sheneýnik pen kásipker sottalǵanyn jazǵan edik.
