SQO-da qarasha aıynda aýa raıy qandaı bolady

PETROPAVL. KAZINFORM - Qarasha aıynda Soltústik Qazaqstan oblysynda aýa raıy normadan jyly bolady dep boljanǵan.

«Qazgıdromet» kásiporny kúzdiń sońǵy aıynyń aýa raıy boljamyn jasady.

Sınoptıkterdiń aıtýynsha, aılyq ortasha temperatýra -4,8...-6°S shamasynda bolmaq, bul klımattyq normadan 1 gradýsqa joǵary (norma: -5,9...-7,2°S).

Aıdyń birinshi jáne ekinshi onkúndiginde aýa raıy qubylmaly bolady. Bul kezeń jaýyn-shashyndy bolyp, qar aralas jańbyr, jabysqaq qar, keı kúnderi arty kóktaıǵaqqa aınalatyn jaýyn jaýady. Aýa temperatýrasy túnde 0...-5°S-tan -10...-15°S-qa deıin, kúndiz +3...+8°S jylydan -7...-12°S sýyqqa deıin aýytqyp otyrady.

Kóliktiń dóńgelekterin qysqy shınaǵa aýystyra berýge bolady. Óıtkeni mamandardyń aıtýynsha, aıdyń basynda qar túsip jatpaǵanymen, aı boıy jıi kóktaıǵaq bolmaq. Jeldiń ekpini keı kúnderi 15-20 m/s-qa deıin jetedi dep boljanǵan. Birinshi onkúndiktiń sońynda, ekinshi jáne úshinshi onkúndikterdiń basynda boran soǵýy yqtımal. Ekinshi onkúndiktiń ortasynan bastap turaqty qar jamylǵysy qalyptasa bastaıdy.

Úshinshi onkúndikte jaýyn-shashyn az bolmaq. Temperatýra birtindep tómendep, túngi ýaqytta -20...-25°S, al kúndiz -15...-20°S qatty aıaz turady.

Qarasha aıyndaǵy jaýyn-shashyn mólsheri 25-40 mm shamasynda bolady dep boljanǵan, bul oblystyń basym bóliginde normadan joǵary, norma: 21-36 mm.

Buǵan deıin 16 qazan kúni sınoptıkterdiń málimetinshe, búgin Aqtóbe, Almaty jáne Pavlodar qalalarynda atmosferanyń lastanýyna yqpal etetin qolaısyz meteorologııalyq jaǵdaı qalyptasatynyn jazǵan edik.