SQO-da qandaı jumysshy mamandyqtarǵa suranys joǵary

PETROPAVL. KAZINFORM — Soltústik Qazaqstan oblysynda qazirgi ýaqytta 2,1 myńǵa jýyq jumysshy mamandyqtardyń orny bos tur.

SQO ákiminiń orynbasary Júsip Jumaǵulovtyń aıtýynsha, búginde aýyl sharýashylyǵynda traktorıst-mashınıster jetispeıdi. Eńbek naryǵynda túrli profıldegi elektrıkter, dánekerleýshiler, santehnıkter tapshylyǵy bar. Osy máseleni sheshý úshin jumysshy mamandyqtaryna oqytatyn kolledjderde bıyl memlekettik tapsyrys 39-dan 45% deıin ulǵaıtylmaq.

— Búginde óńirde 11 myń stýdenti bar 24 kolledj jumys isteıdi. 24 kolledjdiń 13-i jumysshy mamandyqtary boıynsha daıarlaıdy. Bul — 3 myńnan astam stýdent. Sondaı-aq, 3 myńǵa jýyq jasty dýaldy oqýmen qamtýdy josparlap otyrmyz. Búgingi tańda qalalyq kolledjder 100% tolyq bolsa, aýyldyq oqý oryndarynda profıtsıt bar. Sondyqtan, oblys boıynsha jumysshy mamandyqtarynyń bedelin arttyrý aıasynda óńirlik kásibı sheberlik chempıonattaryn, jumysshy mamandar jas kóshbasshylarynyń forýmyn, sheberlik saǵattaryn ótkizý, jańa kásipter atlasyn ázirleý josparlanǵan, — deıdi Júsip Jumaǵulov.

Buǵan deıin SQO-daǵy kolledjder óńir ekonomıkasynyń 11 negizgi salasy boıynsha: aýyl sharýashylyǵy, qurylys jáne kommýnaldyq sharýashylyq, ónerkásip, energetıka, kólik, aqparattyq tehnologııalar, bilim berý, densaýlyq saqtaý, mádenıet, qyzmet kórsetý salasy, aýyl sharýashylyǵy ónimderin qaıta óńdeý boıynsha daıarlaıtynyn jazǵan bolatynbyz. 

Jalpy 67 mamandyq jáne 105 biliktilik boıynsha oqytady.