SQO-da ishek ınfektsııasyn juqtyrǵandardyń 60% úıdiń asynan ýlanǵan
SQO Sanıtarııalyq-epıdemıologııalyq baqylaý departamenti baspasóz qyzmetiniń málimetinshe, jiti ishek ınfektsııalaryn juqtyrý jaǵdaılarynyń 90 % astamynda syrqattyń úıde daıyndalǵan ónimderden ýlanǵany anyqtalǵan. Ekinshi sebep – jeke bas tazalyǵyn saqtamaý. Jazda, ádette, tamaqtan ýlaný jıileıdi, óıtkeni osy kezeńde qaýipti bakterııalardyń tez kóbeıýine qolaıly jaǵdaı týady.
Jyl basynan beri jiti ishek ınfektsııalaryn juqtyrýdyń 149 jaǵdaıy tirkelgen, 2021 jyldyń uqsas kezeńimen salystyrǵanda 16,5 % tómendeý baıqalady. Máselen byltyr 180 adam dárigerge qaralǵan. Toppen aýyrý jaǵdaılary tirkelgen joq.
«Negizinen jiti ishek ınfektsııalaryn 14 jasqa deıingi balalar juqtyrǵan, bul – barlyq aýyrǵandardyń 72 % nemese 73 jaǵdaı. Sonyń ishinde 2 jasqa deıin 44 sábı aýyrǵan.
Negizgi sebebi – úıde daıyndalǵan ónimder boldy. Bul – barlyq jaǵdaılardyń 62 %. Jeke gıgıenany saqtamaýdyń úlesi – 30 %, kókónister men jemisterdi durys jýmaı jeýden – 2 %, sút jáne sút ónimderinen – 4 %, et jáne et ónimderinen ýlaný 2 % quraǵan. Jiti ishek ınfektsııalary oshaqtarynan 43 aýyz sý synamasy zertteldi, aýytqý tirkelgen joq», - deıdi SQO Sanıtarııalyq-epıdemıologııalyq baqylaý departamentiniń bólim basshysy Saltanat Bekqojına.
Sondaı-aq SQO-da bıyl dızenterııanyń 2 jaǵdaıy tirkelgen.
«Ýlanýdan saqtanýǵa kómektesetin qarapaıym erejelerdi este saqtaǵan jón. Eń bastysy, jeke gıgıena erejelerin qatań saqtańyz, qolyńyzdy sabynmen jıi jáne muqııat jýyńyz, ásirese tamaqtanar aldynda jáne dárethanaǵa barǵannan keıin. Qaınatylǵan, bótelkedegi sýdy tutynyńyz. Kókónisterdi, jemis-jıdekterdi tutynar aldynda aǵyn sý astynda jýyńyz. Al kishkentaı balalar úshin qaınatylǵan sýmen jýý kerek. Tamaq ónimderin ruqsat etilmegen saýda oryndarynan satyp alýǵa bolmaıdy. Tez buzylatyn taǵamdardyń jaramdylyq merzimi men saqtaý sharttaryn saqtaý, shıki taǵamdar men daıyn taǵamdy bólek saqtaý kerek. Taǵamdardy, ásirese et, qus eti, jumyrtqa jáne teńiz ónimderin muqııat qýyryńyz nemese qaınatyp baryp qana qoldanyńyz», - deıdi Saltanat Bekqojına.
Mamannyń aıtýynsha, quramynda sýy kóp qarbyz, qaýyn, órik, shabdaly, shıe, qulpynaı, ıaǵnı maýsymdyq jıdekter men jemister jazda tez búlinedi. Eger saqtaý jáne tasymaldaý sharttary saqtalmasa, mundaı ónimderdiń lastaný qaýpi joǵary. Jýylǵan, arshylǵan jáne týralǵan jemisterdi saqtaý merzimi tym qysqa – olardy ústelge qoıǵannan keıin birden jegen jón.