SQO-da ınternet-alaıaqtar joq kólikti satyp, jurtty aldap jatyr
SQO polıtsııa departamenti baspasóz qyzmetiniń málimetinshe, ınternet-alaıaqtar áleýmettik jelide ustalǵan avtokólikterdi satý týraly jalǵan habarlandyrýlar jarııalaǵan. Ádette ol 1990 jyldary shyqqan sheteldik markaly avtokólikter. Qyzyǵýshylyq tanytqandarǵa tek WhatsApp arqyly habarlasýdy suraıdy.
Aýdanda uıaly baılanystyń nasharlyǵyn sóz etip, vıdeoqońyraýǵa jaýap bermeıdi. Budan bólek, «kóliktiń» baǵasyn odan saıyn túsirip, kishkentaı balasynyń naýqas ekenin, aqshaǵa óte muqtaj ekenin aıtady. Senimge kirgennen keıin, aldyn ala tólem alady. Keıin baılanysqa shyǵýdy toqtatady.
«Jábirlenýshiler «satýshyny» izdep, Shal aqyn aýdanynyń ortalyǵy Sergeevka qalasyna kelip, ýáde etilgen kólikti izdegen, biraq habarlandyrýda kórsetilgen mekenjaıda múldem kóligi joq adamdar turatynyn anyqtaǵan. Osydan eki jyl buryn alaıaqtardyń bul tásili týraly BAQ-ta jáne áleýmettik jelilerde jarııalaǵannan keıin mundaı jaǵdaılar toqtaǵan edi. Endi bıyldyqqa eki fakti tirkelip otyr.
Eger satýshynyń adaldyǵyna tolyq senimdilik bolmasa, adamdardan aldyn ala tólem jasaýǵa kelispeýin suraımyz. Beıneqońyraý arqyly sóılesýdi talap etken jón. Alaıaqtar ádette bet-álpetin jasyryp, sóılesýge kelispeıdi», - deıdi SQO PD krımınaldyq polıtsııa basqarmasynyń bastyǵy Marat Jumalıev.
SQO polıtseıleri alaıaqtyq bolýy múmkin habarlandyrýlardy anyqtaý úshin veb-keńistikke monıtorıng júrgizedi. Ótken jyly qylmyskerler óńir turǵyndarynyń senimine kirip, tanymal habarlandyrý saıttary men áleýmettik jelilerde 343 ret adamdardy san soqtyrǵan. Olar negizinen OLH.kz saıtynda aılalaryn iske asyrǵan. Mundaı 183 fakti tirkeldi.
Al Instagram qoldanýshylaryn alaıaqtar 83 ret aldaǵan. Veb-resýrstarynyń halyq arasynda tanymal bolyp, jumysynyń durys bolýyn qadaǵalap otyratyn ákimshiler yntymaqtastyqqa daıyn. Ótken jyly kolesa.kz, krysha.kz, OlH.kz habarlandyrý saıttarynda, Instagram jelisinde 1430 habarlandyrý tekserildi, onyń 267-si jalǵan dep buǵattaldy.
