SQO-da ınsýlt budan bylaı jasandy ıntellekt arqyly anyqtalmaq
«Cerebra» avtomattandyrylǵan platformasy - baǵdarlamashylar, taldaýshylar, matematıkter men dárigerlerdiń úsh jyldyq qajyrly eńbeginiń nátıjesi. Ótken jyldyń qańtar aıynda Almatynyń eki ınsýlt ortalyǵynda pılottyq joba iske qosyldy. Qazirgi ýaqytta bul baǵdarlama eldiń 30-dan astam ınsýlt ortalyqtarynda jumys istep keledi. Endi olardyń qataryna SQO kópbeıindi aýrýhananyń ınsýlt ortalyǵy da qosylmaq.
«Byltyrdan bastap biz ınsýlttyq qyzmetti damytyp jatyrmyz, óıtkeni ol búgingi tańda ózekti, syrqattar kóbeıgen jáne qaıtys bolatyndar sany artqan. Insýlt alǵandar arasynda jastar da kóbeıip otyr, saldarynan múgedek bolyp jatqandar da barshylyq.
Búgin biz mańyzdy baǵdarlama - jasandy ıntellektini qosyp jatyrmyz. Mamandarǵa mı qan aınalysynyń buzylýy bar naýqasqa ota túrin tańdaýǵa, emdeý ádisin durys qoldanýǵa kómektesedi. Baǵdarlama ınsýltti óte erte kezeńde anyqtaýǵa negizdelgen. Kompıýterlik tomograf apparatymen birge jumys isteıdi. Bylaısha aıtqanda, dárigerge kómekshi qural.
Baǵdarlamanyń tehnıkalyq qosylýy jeltoqsan aıynda boldy. Osy aralyqta múmkindigin, ıaǵnı aqparatty jiberý jyldamdyǵyn, óńdeýin baıqadyq, ázirge kem-ketigi baıqalǵan joq. Bul baǵdarlamaǵa basqa dárigerler de qashyqtan qosyla alady, osylaısha keńesip sheshim qabyldaýǵa múmkindik bar», - deıdi SQO kópbeıindi aýrýhananyń angıografııa meńgerýshisi Sergeı Rýtskıı.
Mamandardyń aıtýynsha, Qazaqstanda jyl saıyn ınsýlttan 40 myńǵa jýyq adam qaıtys bolady, aman qalǵandardyń 80 %-y múgedek bolyp qalady. Sondyqtan derttiń bul túrin erte bastan anyqtaýdyń mańyzy zor.
«Insýlt alǵan syrqat emdeý mekemesine túskennen keıin ol kompıýterlik tomografııaǵa jiberiledi. KT-dan ótý barysynda bul baǵdarlama avtomatty túrde qosylady. Oǵan nevropatolog, jedel járdem dárigeri óz málimetterin engizedi. Syrqattyń shaǵymy da eskerilip, nátıjesinde baǵdarlama 3-5 mınýttyń ishinde tolyq taldaý jasap shyǵarady. Buryn taldaýdy dáriger jasaıtyn.
Bul – qosymsha, ony telefonǵa, planshetke, kompıýterge júkteýge bolady. Mysaly syrqat túsken kezde dárigerge habarlama keledi, ol kimniń túskeni jaıynda tolyq aqparat alady. Sondaı-aq KT-nyń taldaýy qoljetimdi bolady. Nege nazar aýdarý kerektigin de anyqtap beredi. Mı qan aınalymynda qandaı ózgeristerdiń barlyǵyn jáne qaı jerde ıshemııa bolatyndyǵyn kórsetedi.
Bul óte yńǵaıly, máselen, meni úıden shaqyrtty, men jolda kele jatyp, osy baǵdarlama arqyly syrqattyń jaǵdaıyna qanyǵam. Al ınsýltta ýaqyttyń úlken rol atqaratynyn bilesizder», - deıdi Sergeı Rýtskıı.
Aıta keteıik, qazaqstandyq cerebra baǵdarlamasy álemniń úzdik 10 Medtech startapynyń qataryna endi. Sondaı-aq «Ey Entrepreneur 2021» nusqasy boıynsha «ınnovatsııalyq startap» nomınatsııasyn aldy.
