SQO-da «HERMES LTD» qarjy pıramıdasy anyqtaldy

NUR-SULTAN. QazAqparat – Soltústik Qazaqstan oblysynda qarjy pıramıdasy anyqtaldy, dep habarlaıdy QazAqparat QR Qarjy monıtorıngi agenttigine silteme jasap.

«QR Qarjy monıtorıngi agenttiginiń Soltústik Qazaqstan oblysy boıynsha departamenti «HERMES LTD» qarjy pıramıdasynyń qyzmetin uıymdastyrý faktisin anyqtady», - delingen usynylǵan málimette.

Anyqtalǵandaı, 2019-2022 jyldar aralyǵynda halyqtyń qarajatyn tarta otyryp «HERMES LTD» jobalary boıynsha qarjy pıramıdasy qurylǵan. Qyzmeti – qatysýshylardy basqalardyń jarnalary esebinen baıytý bolǵan.

«Qylmystyq is boıynsha jábirlenýshi retinde úsh adam tanyldy. Olar jalpy somasy 4 mıllıon teńgege jýyq shyǵynǵa ushyrady. Qazirgi ýaqytta tergeý amaldary júrgizilip jatyr», - dedi agenttikten.

Qarjy monıtorıngi agenttigi qarjy pıramıdasyna qatysty aryz-shaǵymdy vedomstvonyń senim telefonyna nemese aýmaqtyq qarjy monıtorıngi organdaryna habarlaýǵa bolatynyn aıtady.