SQO-da halyqaralyq jas aqyndar konkýrsy ótip jatyr

PETROPAVL. QazAqparat - Petropavlda Ábý Dosmuhambetov atyndaǵy oblystyq daryndy balalarǵa arnalǵan mamandandyrylǵan gımnazııa-ınternatynda «Jyr juldyzy  Maǵjan poezııasy - ulttyq rýhanııat negizi» atty halyqaralyq jas aqyndar konkýrsy ótip jatyr, dep habarlaıdy «QazAqparat» HAA tilshisi.

Konkýrsta Soltústik Qazaqstan, Kókshetaý oblystary jáne RF Omby oblysynan 40 aqyn óner kórsetip jatyr. 5-11 synyp oqýshylary 4 nomınatsııa boıynsha baq synaýda: Maǵjan Jumabaevtyń shyǵarmashylyǵy boıynsha zertteý jumysy, aqynnyń óleńderin mánerlep oqý konkýrsy, óz shyǵarmashylyǵynan Maǵjanǵa arnalǵan óleń oqý jáne jas aqyndar aıtysy.

Sanat Isimov Omby oblysynan kelgen. Ol óz óleńin oqý nomınatsııasyna qatysyp jatyr.

«Bizdiń mektepte orys tilinen de, qazaq tilinen de sabaqtar ótedi. Qazaq tilin erkin meńgergenmin. Meniń óleńim «Men jastarǵa senemin» dep atalady. M.Jumabaevqa arnalǵan is-sharaǵa, Petropavlǵa alǵash ret kelip otyrmyn», - dedi Sanat.

Konkýrs jeńimpazdary dıplomdar, alǵys hattar, sertıfıkattar men syıaqylar alady.