SQO-da esirtki qylmysy bes ese ósken

PETROPAVL. KAZINFORM – Soltústik Qazaqstan oblysynda sońǵy úsh jylda esirtki qylmysynyń sany ósken. 2020 jyly 58 fakti anyqtalsa, byltyr 290-ǵa jetti. Jyl bastalǵaly 80 derek tirkelip otyr. 

SQO prokýratýrasynyń sotqa deıingi tergep-tekserý jáne qylmystyq qýdalaýdyń zańdylyǵyn qadaǵalaý basqarmasynyń bastyǵy Saıan Asqarov brıfıngide geroın, marıhýana, gashısh sııaqty «dástúrli» esirtkilerdiń ornyna sıntetıkalyq túrleri keń taraǵanyn aıtty. Búginde «tuzdardy» messendjerler arqyly esh qıyndyqsyz satyp alýǵa bolady. 

«Esirtkiniń zańsyz aınalymymen buryn 25 pen 40 jas aralyǵyndaǵy, birneshe ret sottalǵan adamdar aınalysqan bolsa, qazir olardyń ornyn 17 men 25 jas aralyǵyndaǵy ártúrli áleýmettik topqa jatatyn jastar basqan. Olardyń basym bóligin buryn qylmystyq jaýapkershilikke tartylmaǵan jáne aqsha tabýdyń ońaı jolyn izdep kelgender qurap otyr. Qylmyskerler Telegram áleýmettik jelisin aqparattyq platforma retinde paıdalanady. Chattarda esirtkiniń túri, onyń qaptamasy, salmaǵy men quny týraly aqparat ornalastyrylady. Ótken jyldyń sońynda qala prokýratýrasy esirtki zattaryn jarnamalaýdyń tórt faktisin anyqtady, bir fakt boıynsha qylmys esepten jasyrylǵan dep tirkeldi, qalǵan úsheýi boıynsha protsessýaldyq sheshim úshin qylmystyq qýdalaý organyna jiberildi, - dedi Saıan Asqarov.

Byltyr oblysta esirtki zerthanasynyń jumysy toqtatylyp, psıhotroptyq zattar, reagentter men nashany jasaýdyń qural-jabdyqtary tárkilendi. Osy fakti boıynsha Petropavl turǵyny jaýapqa tartylyp, 11 jylǵa bas bostandyǵynan aıyryldy.

Jastardyń teris jolǵa túspeýi úshin quzyrly organdar birinshi orynǵa profılaktıkalyq jumysty qoıǵan. Onyń aıasynda kámeletke tolmaǵan sottalýshylardyń qylmystyq isterin qaraý kezinde kolledjder men joǵary oqý oryndarynyń stýdentteri sot protsesine shaqyrylady. 

Buǵan deıin pavlodarlyq lýdomannyń psıhıkalyq aýytqýy bar qyzdyń atyna nesıe rásimdegenin jazǵan edik.