SQO-da energetıka salasynda 250 maman jetispeıdi

Soltústik Qazaqstan oblysyn jylý-elektrmen qamtıtyn kompanııada kadr jetispeýshiligi ózekti másele. Qazirgi ýaqytta munda 253 mamannyń oryn bos tur, dep habarlaıdy Kazinform.

SQO energetıka jáne turǵyn úı-kommýnaldyq sharýashylyq basqarmasy basshysynyń mindetin atqarýshy Vladıslav Lýkınniń aıtýynsha, bul salada 1 189 qyzmetker bolýy qajet, alaıda is júzinde bar jumysty 936 adam atqaryp júr.

"Bilikti mamandar az tólenetin eńbekaqyǵa kelmeıdi, kadr jetispeýshiliginiń negizgi sebebi tómen jalaqy bolyp otyr. Ol qazirgi ýaqytta 171 myń teńgeni quraıdy. Saldaryn tutynýshylar kóredi. Maman jetispeýshiliginen elektr energııasyn berý boıynsha qyzmet kórsetý sapasy tómendeıdi. ıAǵnı, birneshe eldi mekende apattyq jaǵdaı týyndaǵan jaǵdaıda, oǵan barý ýaqyty uzarady, al eger qolaısyz meteojaǵdaılar bolyp, jol nasharlasa, jaǵdaı tipten qıyndaıdy", - deıdi Vladıslav Lýkın.

«Sevkazenergo» AQ bas dırektory Anatolıı Kazanovskııdiń aıtýynsha, eńbekaqynyń azdyǵynan kadr turaqtamaıdy. Búgingi tańda Aqqaıyń aýdanynda - 27, Esil aýdanynda - 26, Jambyl aýdanynda - 21, Qyzyljar aýdanynda -15, Maǵjan Jumabaev aýdanynda - 22 jáne Petropavlda 116 bos jumys orny bar.

Mamandardyń aıtýynsha, máseleni sheshýge bolady, ol úshin tarıfti kóterý arqyly eń aldymen eńbekaqyny eń bolmaǵanda respýblıka deńgeıine jetkizý. Stıpendııa tóleý, aqyly tájirıbeden ótýge jaǵdaı jasaý arqyly stýdentterdi qyzyqtyrý jáne keletin jas mamandarǵa baspana usynyp, áleýmettik jaǵdaıyn jasaý.