SQO-da ekologtar «Sevkazenergo» AQ kásiporyndaryn tekserip, 4,7 mln teńge aıyppul saldy

PETROPAVL. QazAqparat – Soltústik Qazaqstan oblysynda ekologtar «Sevkazenergo» AQ-nyń birneshe kásipornyna - Petropavl 2-JEO, №2 kúl úıindisiniń №3 sektsııasy, «Roşınka» ken orny karerine profılaktıkalyq baqylaý jáne qadaǵalaý júrgizdi. Nátıjesinde birneshe zań buzýshylyqty anyqtady, dep habarlaıdy QazAqparat tilshisi.

SQO ekologııa departamenti baspasóz qyzmetiniń málimetinshe, ekologtar «Sevkazenergo» AQ-nyń birneshe kásipornyna tekserý júrgizip, nátıjesinde ekologııalyq zańnamany buzýdyń 16 deregin anyqtady. Onyń 13-i – óreskel zań buzýshylyq bolyp esepteledi.

Sonyń ishinde energetıkter qorshaǵan ortaǵa emıssııalarǵa ruqsattarmen belgilengen tabıǵat paıdalanýdyń mindetti sharttaryn oryndamaǵan, qorshaǵan ortany qorǵaý jónindegi is-sharalar josparynyń oryndalýy týraly jyl saıynǵy esepterdi usynbaǵan.

«Kásiporyn óndiristik ekologııalyq baqylaýdy júrgizý kezinde alynatyn derekterdiń sapasyna mán bermeı, saldarynan esepterde dáıeksiz málimetter usynylǵan. Gaz qubyrlaryn №2 tútin qubyryna qaıta qosý kezinde mindetti memlekettik ekologııalyq saraptama júrgizý talaptaryn oryndamaǵan. Budan basqa, qorshaǵan ortany qorǵaý salasyndaǵy ýákiletti organǵa bolǵan avarııalar týraly habarlamanbaǵan. Qaýipti qaldyqtardy qaýipsiz qaldyqtarmen aralastyryp, qurylys qaldyqtaryn basqarý jónindegi operatsııalardy júzege asyrý kezinde ekologııalyq talaptardy buzýǵa jol berildi», - delingen baspasóz habarlamasynda.

Bul zań buzý faktilerin joıý maqsatynda kásiporynǵa uıǵarym engizildi.

QR Kásipkerlik kodeksiniń 137-baby 3-tarmaǵynyń 3-bóligine sáıkes ekologııalyq zańnamany buzǵany úshin zańdy tulǵaǵa qysqartylǵan óndiris tártibimen jalpy somasy 4 747 650 teńge aıyppul túrinde 9 ákimshilik jaza qoldanyldy.

Sonymen qatar, departament baqylaý jáne qadaǵalaý sýbektisine baryp, anyqtalǵan óreskel zań buzýshylyqtardy joıý týraly nusqamanyń oryndalýyn baqylaý boıynsha jospardan tys tekserý júrgizetin bolady.