SQO-da eki mektepte kúrdeli jóndeý tek qazan aıynda aıaqtalmaq

PETROPAVL. QazAqparat – Soltústik Qazaqstan oblysyndaǵy mektepterdiń 33%-ynda kúrdeli jóndeý nysan paıdalanýǵa berilgennen beri júrgizilmegen. 128 mekteptiń jylytý júıesi talapqa saı emes, dep habarlaıdy QazAqparat tilshisi.

«QR Oqý-aǵartý mınıstrligi Bilim salasynda sapany qamtamasyz etý komıtetiniń SQO bilim salasynda sapany qamtamasyz etý departamenti» MM basshysy Alena Malgaeva Oqý-aǵartý mınıstrligi 10-24 shilde aralyǵynda óńirdiń jalpy bilim beretin mektepterine júrgizgen monıtorıngti qorytyndylady.

Monıtorıng nátıjesinde SQO-daǵy mektepterdiń 33% - ashylǵan sátten bastap kúrdeli jóndeý kórmegeni anyqtaldy. 128 mektepte jylý júıesin jóndeý qajet.

«Shilde aıynyń sońynda oblystaǵy 43 mektepte kúrdeli jóndeý jumystary júrgizildi. Tamyz aıynyń basyndaǵy jaǵdaı boıynsha Petropavldaǵy №31 orta mektepte jáne Ǵ.Músirepov atyndaǵy aýdannyń Lomonosov orta mektebinde nysandy tapsyrý boıynsha merzimnen artta qalý anyqtaldy. Taıynsha aýdanynyń Donetsk orta mektebinde jáne Aıyrtaý aýdanynyń Novosvetlov orta mektebinde kúrdeli jóndeý tek qazan aıynda aıaqtalmaq. Qazirgi ýaqytta jóndeý jumystary basqa mektepterde de jalǵasqan», - deıdi Alena Malgaeva.

Departament basshysynyń aıtýynsha, ótken jyldardyń tájirıbesi men jóndeý jumystarynyń 1 qyrkúıekke deıin aıaqtalmaý qaýpin eskere otyryp, oqý protsesiniń buzylýyna jol bermeý jáne balalardyń qaýipsiz bolýyn qamtamasyz etý boıynsha barlyq mektepterde is-sharalar jospary ázirlendi.

«Bul monıtorıng óńirdiń bilim berý júıesindegi máselelerdi anyqtaýǵa jáne olardy joıý boıynsha tıisti usynymdar ázirleýge, jergilikti atqarýshy organdar men qoǵamnyń belsendi ókilderin bilim berý qyzmetteriniń sapasyn arttyrý jónindegi problemalardy birlesip sheshýge tartýǵa múmkindik berdi. Júrgizilgen monıtorıng nátıjeleri Bilim Mınıstrliginiń keńeıtilgen otyrysynda keńinen talqylandy, onyń qorytyndysy boıynsha jańa oqý jylyna negizgi mindetter aıqyndaldy», - deıdi Alena Malgaeva.