SQO-da eki qus fabrıkasyna 9,2 mln teńge aıyppul salyndy
Óńirlik kommýnıkatsııalar qyzmetinde monopolııaǵa qarsy organ ótken jarty jyldyqtaǵy jumysyn qorytyndylady. QR Básekelestikti qorǵaý jáne damytý agenttiginiń SQO boıynsha departament basshysynyń orynbasary Aslan Álippaevtyń aıtýynsha, osy aralyqta qus fabrıkalaryna qatysty eki tergeýdi aıaqtady. Olar taýyq jumyrtqasynyń kóterme baǵasyn kelisimmen negizsiz kótergen.
Sot sheshimimen eki kásiporyn jaýapkershilikke tartylyp, 9,2 mln teńge aıyppul salyndy, bul aqsha tolyq kólemde bıýdjetke tústi. Ótken jyldyń mamyr aıynda sot sheshimimen bul eki qus fabrıkasy baǵany kótergeni úshin aıyppul tóledi. Ol eskerilip, salynǵan aıyppul kólemine áser etti.
Sondaı-aq qus fabrıkalary zań buzýshylyqtardy joıý boıynsha nusqamalardy oryndap, jumyrtqanyń baǵasyn «Adel Qus» JShS orta eseppen 20%, «Alekrı Fırma» JShS 15% arzandady.
«Budan basqa, zań buzýshylyq belgileriniń bar ekendigi týraly habarlamanyń oryndalmaýyna baılanysty bıylǵy tamyz aıynda departament kúrishti kóterme saýdada ótkizetin iri jetkizýshige qatysty tergep-tekserýdi bastady.
2021 jyly jáne 2022 jyldyń qańtar-qyrkúıek aralyǵynda kásipker óziniń naryqtaǵy ústem jaǵdaıyn paıdalanyp, kúrishke ártúrli kóterme baǵany negizsiz qoldanǵan. Keıin jiberilgen habarlamaǵa jaýap berip, kúrish baǵasyn tómendetkenin jáne budan bylaı bir baǵamen satylatynyn aıtqan.
Alaıda ótken jyldyń qazan-jeltoqsan aılary jáne osy jyldyń 1 jartyjyldyǵynda kúrishke taldaý júrgizý kezinde, taýarǵa ártúrli baǵa qoldaný tájirıbesi toqtatylmaǵany anyqtaldy», - deıdi Aslan Álippaev.
