SQO-da egin oraǵyna qosymsha 10 myń tonna arzan dızel otyny bólinbek

PETROPAVL. KAZINFORM – Soltústik Qazaqstan oblysynyń dıqandary jeńildetilgen baǵamen dızel otynyn alý úshin ótinim bere alady.

SQO ákimdiginde oraq naýqanynyń barysy pysyqtaldy. Aýyl sharýashylyǵy jáne jer qatynastary basqarmasynyń málimetinshe, bıyl 4,3 mln ga aýmaqtan dándi daqyl jınaý mindeti tur. Kúzgi jumysqa 58,2 myń tonna dızel otyny bólindi. Naryqta lıtri 315 teńge bolsa, munyń baǵasy 254 teńge.

- Qosymsha 10 myń tonna arzandatylǵan dızel otynyn bólý josparlanyp otyr. Osyǵan baılanysty, ótinim berip úlgermegen sharýashylyqtar bul qoldaýdy paıdalana alady, jergilikti atqarýshy organdar der kezinde habardar etýi qajet, - dedi basqarma basshysy Dáýren Toqýjınov.

Mamandardyń aıtýynsha, bıyl daqyldyń shyǵymy jaqsy. Jospar boıynsha eginniń 40% alqaptan tikeleı jınalmaq. ıAǵnı aýa raıy mursat bergen jaǵdaıda oraq naýqany 30–35 kún ishinde aıaqtalmaq.

- Óńirde astyqty qabyldaıtyn 45 elevator bar, jalpy syıymdylyǵy 3,2 mln tonna. Budan bólek sharýashylyqtardyń 3,7 mln tonna sııatyn astyq qabyldaý oryndary bar. Bul bıylǵy astyqty tolyq saqtaýǵa múmkindik beredi.

Qazirgi tańda astyq qabyldaý oryndary 24% tolyq, 761 myń tonna jatyr. Onyń 413 myń tonnasy Azyq-túlik kelisimshart korporatsııasyniki. Olar astyqty ózge óńirlerge jáne eksportqa jóneltip jatyr. Barlyq astyq qabyldaý pýnktteri jańa ónimdi qabyldaýǵa tolyq daıyn, - dedi Dáýren Toqýjınov.

Buǵan deıin SQO-daǵy elevator ıeleri Qazaqstan Respýblıkasy Básekelestikti qorǵaý jáne damytý agenttiginiń jańa bastamalaryna qarsylyq bildirgenin jazǵan edik.