SQO-da drondar sý tasqyny qaýpin baqylaý úshin qoldanylady

ASTANA. KAZINFORM – Soltústik Qazaqstan oblysynyń ákimdigi naýryz aıynyń sońyna qaraı ushqyshsyz basqarylatyn apparattardy qoldanysqa engizbek.

– Soltústik Qazaqstan oblysynda «Biryńǵaı dron ınfraqurylymy» jobasy sý tasqyny kezeńinde (naýryz aıynyń sońynda, eki aıǵa) iske qosylady. Bul máseleni qarastyrý aıasynda «Qazaqtelekom» AQ-nyń pılotsyz ushý apparattaryn paıdalaný jónindegi usynysy zerttelip, ony sý tasqyny jaǵdaıyn naqty ýaqyt rejıminde baqylaý úshin qoldaný usynyldy. Soltústik Qazaqstan oblysynyń Tótenshe jaǵdaılar departamentimen birlesip, jobany ázirleýshilermen birneshe kezdesýler ótti. Onda drondardy jalǵa alý sharttary, olardyń fýnktsıonaldyq múmkindikteri jáne sý tasqyny kezeńinde jaýapty qyzmetterdiń ózara is-qımyl tártibi talqylandy, - delingen ákimdiktiń agenttik tilshisine bergen jaýabynda.

Ákimdik qyzmetkerleri sý tasqynynan qaýip tóngen ýaqytta drondar qandaı qyzmet atqaratynyn da naqtylady.

– Qazirgi ýaqytta joba tótenshe jaǵdaılardy, atap aıtqanda, sý tasqyny jaǵdaıyn baqylaý salasynda júzege asyrý josparlanyp otyr. Usynylǵan modelge sáıkes, oblystyń negizgi oryndarynda avtomatty qýattandyrý kesheni bar 8 dron iske qosylady. Olardyń negizgi mindeti – sý deńgeıiniń synı ózgeristeri men yqtımal qaýipter týraly derekterdi jedel berý, bul TJD qyzmetterine ýaqytyly áreket etip, evakýatsııalaý nemese basqa da sharalardy qabyldaý týraly sheshimder qabyldaýǵa múmkindik beredi, - deıdi olar.

Aıta ketsek, Memleket basshysynyń tapsyrmasymen «Birińǵaı drondar ınfraqurylymy» pılottyq jobasy qolǵa alynǵan bolatyn.

Drondardyń negizgi maqsaty - memlekettik jáne ınfraqurylymdyq jobalardyń tıimdiligin arttyrý. Qurylǵylar mektepter men joldardyń qurylysyn, jylý jelileriniń jaǵdaıy syndy túrli memlekettik mańyzdy obektilerdiń jumysyn baqylaýǵa da paıdalanylady. Nátıjesinde basqarý júıesiniń ashyq bolýyn qamtamasyz etedi. 

Eske sala keteıik, kóktemgi tasqynǵa qarsy Aqtóbe oblysynyń ákimdigi qaıyq pen dron satyp alyp jatqanyn jazǵan edik.